इटहरी : फुटपाथ ‘क्लियर’ गर्न इटहरी उपमहानगरपालिकाका मेयर हेमकर्ण पौडेलले निर्देशन दिएका छन् ।
पछिल्लो समयमा अव्यवस्थित सवारी पार्किङ, निर्माण सामाग्री सडकमा थुपार्ने, ठूला व्यापारिक महलबाटै सडक पार्किङले इटहरी अस्तव्यस्त हुन थालेको भन्दै ‘क्लियर’ गर्न निर्देशन दिएका हुन् ।
अहिले इटहरी चौकको मुख्य राजमार्गदेखि पूर्व तथा पश्चिम लाइनका सडकहरू व्यापारीहरूले कब्जा गरिरहेको मेयर पौडेलको दाबी छ ।
निजी गाडी तथा व्यापारिक सवारी साधनले सडक कब्जा गरेको भन्दै तत्काल फुटपाथ खाली गर्ने अभियानमा लागिएको उनले बताए । मंगलबार आफैँ फुटपाथ ‘क्लियर’ गराउँदै सडकमा निस्किएर पौडेलले निरन्तर अभियानमा लाग्ने बताए ।
‘सडकहरू कब्जा नै जस्तो भएको छ । यात्रुहरू हिड्नसम्म ठाँउ छैन,’ उनले भने, ‘बारम्बार सडकमा सामाग्री बेच्न नपाइने भनिएपनि अटेर गर्नेहरूलाई फुटपाथको सामाग्री नियन्त्रणमा लिएका छौँ ।’
फुटपाथको कारण दुर्घटनासमेत बढेको भन्दै तत्काल हटाउन उनले निर्देशन दिए ।
व्यापारीसँगै सटरवालालेसमेत सडक पेटी नै ढाक्नेगरी बाहिर सामान बेच्न राखेपछि पैदल यात्रुलाई समस्या भएको गुनासो बढेकोले आफू अनुगमनमा निस्किएको मेयर पौडेलले बताए ।
उपमहानगरले नगर प्रहरीसहित ट्राफिक प्रहरी, नेपाल प्रहरी र उद्योगी व्यवसायीसहितको समन्वयमा सडक ‘क्लियर’ गर्ने अभियानमा लागेको जनाएको छ ।
पूर्वकै एक प्रमुख व्यापारिक केन्द्रका रूपमा विकसित हुँदै आएको इटहरीको बजार अस्तव्यस्त हुँदा सर्वसाधारणले सास्ती खेप्नु परेको छ ।
खासगरी इटहरीको मुख्य चौक तथा आसपासमा हिँड्नसमेत सास्ती हुने गरेको छ । पछिल्लो समयमा अव्यवस्थित सवारी पार्किङ, निर्माण सामाग्री सडकमा थुपार्ने, व्यापारीहरूले सडकमै सामाग्री पर्दशन गर्दा सहर क्षेत्र कुरुप बन्दै गएको छ ।
पछिल्लो समयमा बढ्दो सवारी साधनको चाप, सडक क्षेत्रमा आवासीय क्षेत्रको विकास, पैदल यात्रु हिँड्ने छुट्टै व्यवस्था नहुनु, साइकल लेन नहुनु र जनसंख्याको उच्च वृद्धिका कारण इटहरी सडक पैदलयात्रुका लागि बढी जोखिमपूर्ण बन्दै गएको हो ।
यता नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका एसपी विनोद घिमिरेले पैदल यात्री हिँड्ने सडक पेटी कब्जा गर्न नदिनेबारे आफूहरू सचेत रहेको बताए ।
मुख्य बजार क्षेत्रमा सडकमा फुटपाथ पसल राख्दा दुर्घटनाको जोखिम हुने भएकाले हटाइने उनको भनाइ छ । इटहरीसहित प्रदेशका बजार क्षेत्रमा ट्राफिक व्यवस्थापन थप सुधार गरिने उनले जनाए ।
Discussion about this post