इटहरी : इटहरी वडा नं. १ मा रहेको राष्ट्रिय माध्यमिक विद्यालयले विहीबार ७५ जना विद्यार्थीलाई छात्रवृत्ति रकम वितरण गरेको छ ।
विद्यालयको ६९ औं वार्षिकोत्सवको अवसरमा बालविकासदेखि कक्षा १२ सम्मको साधारण तथा प्राविधिकतर्फ अध्ययन गर्ने विद्यार्थीलाई दाताले स्थापना गरेको अक्षयकोषको ब्याजबाट एक लाख ३७ हजार ४२ रुपैयाँ बराबरको छात्रवृत्ति रकम वितरण गरेको हो ।
विद्यालयमा अहिलेसम्म ७५ जना दाताले २० लाख ८८ हजार ७७१ रुपैयाँ बराबरको अक्षयकोष स्थापना गरेका छन् । अघिल्लो ६८ औं वार्षिकोत्सवको बेला १८ लाख ५८ हजार ८६० रुपैयाँको ब्याजबाट ९८ हजार २७३ रुपैयाँको छात्रवृत्ति रकम वितरण गरिएको थियो ।
बर्सेनि विद्यार्थीलाई छात्रवृत्ति रकम बढाएर लैजाने योजना अनुसार दाताले अक्षयकोषमा रकम जम्मा गर्ने क्रम पनि बढेको विद्यालयका प्रधानाध्यापक सरनकुमार बस्नेतले बताए । यस वर्ष २९ जना थप दाताले अक्षयकोषमा रकम जम्मा गरेका छन् ।
प्रधानाध्यापक बस्नेतका अनुसार विद्यालयमा छात्रवृत्ति वितरणका लागि अघिल्लो वर्षसम्म २३ वटा अक्षयकोष स्थापना गरिएकोमा यसपटक अक्षयकोषको संख्या ७५ पुगेको छ ।
पूर्व विद्यार्थी समूहले यस वर्ष थप एक लाख रुपैयाँ बढाएका छन् । अघिल्लो पटकसम्म ३२ जनाले अक्षयकोषमा झन्डै दुई लाख रुपैयाँ जम्मा गरेकोमा यस वर्ष बढाएर तीन लाख रुपैयाँ पु¥याएका छन् ।
कार्यक्रममा एक जना पूर्व जनप्रतिनिधि र अर्का एक जना पूर्व जनप्रतिनिधिलाई मरणोपरान्त सम्मान गरियो । जसमा २०४९ सालदेखि २०५९ सालसम्म तत्कालीन हाँसपोसा गाउँ विकास समिति वडा नं. १ (हालको इटहरी वडा नं. १) का वडाध्यक्ष लालबहादुर लुइँटेल र २०७४ साल असारमा भएको निर्वाचनबाट निर्वाचित वडाध्यक्ष विष्णुलाल चौधरीको निधन २०७७ वैशाख ४ गते भएकोमा मरणोपरान्त सम्मान गरिएको हो । स्वर्गीय चौधरीकी श्रीमती गौरीदेवी र छोरी एलिनाले सम्मान ग्रहण गरिन् ।
सो क्रममा अक्षयकोषमा रकम जम्मा गर्ने २२ जना पूर्व विद्यार्थीलाई सम्मान गरियो । यस्तै, यसै वर्षदेखि अक्षयकोष स्थापना गर्ने पूर्व प्रधानाध्यापक विराटनगर निवासी शम्भुप्रसाद सापकोटा, इटहरीका बद्री अधिकारी तथा पद्माकुमारी अधिकारी, नूतनप्रसाद ढकाल र दीपेन्द्र ढकाललाईं इटहरी उपमहानगरपालिकाका मेयर हेमकर्ण पौडेलले दोसल्ला एवम् सम्मात्रपत्रले सम्मान गरे ।
यस्तै, अक्षय कोष स्थापना गर्ने पूर्व विद्यार्थी इन्जिनियर एकराज भट्टराई, किरण ढुङ्गेल र चित्रबहादुर कार्कीको नेतृत्वमा रहेको निवर्तमान विद्यालय व्यवस्थापन समितिलाई पनि सम्मान गरियो ।
वार्षिकोत्सवको अवसरमा आफ्ना नानीहरुलाई शैक्षिक सत्रभरी विद्यालय सञ्चालन भएको विद्यालयमा उपस्थित गराउने र पढाईमा सहजीकरण गर्ने अभिभावक राजु तामाङ, सुष्मा तामाङ, दानबहादुर विश्वकर्मा, भूमादेवी विश्वकर्मा, मनमाया विक र विद्यालयमा सधैंभरी सफासुग्घर भएर आउने विद्यार्थी कक्षा १ का असिम खत्रीलाई नगदसहित सम्मान गरियो ।
कार्यक्रममा सात जना शिक्षक–कर्मचारीलाई पनि नगदसहित सम्मान गरियो । जसमा शिक्षकहरू कुमारी भारती, सावित्रा श्रेष्ठ, सन्दीप बास्तोला, राजकुमार ढकाल, इन्दिरा थापा, डम्बरकुमारी थापा र कर्मचारी मधुरलाल चौधरीलाई सम्मान गरिएको हो ।
वार्षिकत्सवको अवसरमा आर्थिक वर्ष २०८०/०८१ को वार्षिक आय–व्यय विद्यालयका प्रधानाध्यापक बस्नेतले प्रस्तुत गरेका थिए । जसमा आन्तरिक र बाह्य गरी वार्षिक आम्दानी चार करोड ७२ लाख १८ हजार ८९८ रुपैयाँ र खर्च चार करोड ६६ लाख ४६ हजार ८६० प्रस्तुत गरियो । अघिल्लो आर्थिक वर्ष २०७९/८० मा आम्दानीतर्फ पाँच करोड ६२ लाख ९५ हजार ६८६ रुपैयाँ र सञ्चालन खर्च पाँच करोड ५७ लाख सात हजार ५६८ रुपैयाँ भएको थियो ।
सोही क्रममा विद्यालयले चालु शैक्षिक सत्रका लागि तय गरेको वार्षिक नीति तथा कार्यक्रम पनि विद्यालय व्यवस्थापन समितिका अध्यक्ष कोविदजंग कार्कीले सार्वजनिक गरे ।
उनले सार्वजनिक गरेको कार्यक्रममा विद्यार्थीको चापलाई मध्यनजर गरेर ६ कोठे पक्की भवन निर्माण, विद्यालयको खेलमैदान स्तरोन्नति, सिसि क्यामेरा जडान, विद्यार्थीको निम्ति थप दुईवटा वस थप गर्ने, दुईवटा सौचालय थप गरिने, शुद्द पीउने पानी (फिल्टरसहित) व्यवस्था गर्ने र स्मार्ट विद्यालय स्मार्ट शिक्षक कार्यक्रम लागू गरिने उल्लेख छ । यस्तै, वाल उद्यन निर्माण, पार्किङ्को उचित व्यवस्था, विद्यार्थीको उमेर समूह अनुसार फर्निचरको व्यवस्था, अलगै परीक्षा शाखा, चमेना गृह व्यवस्थित गर्ने, शैक्षिक क्रियाकलापतर्फ शिक्षक कार्यसम्पादन सम्झौता करार गरि कार्यान्वयन गरिनेलगायतका कार्यक्रम प्रस्तुत गरियो ।
वार्षिकोत्सवको अवसरमा साताव्यापी खेलकुद प्रतियोगिता भएको थियो । खेलकुदका विभिन्न विधाका ५१ वटा इभेन्ट सञ्चालन गरिएको थियो ।
विद्यालयमा बालविकासदेखि कक्षा १२ सम्म साधारणतर्फ र प्राविधिकमा डिप्लोमा इन सिभिल इन्जिनियर पढाई हुने यहाँ कुल एक हजार ९२० जना विद्यार्थी अध्ययनरत छन् ।
यहाँ कक्षा ११ र १२ मा शिक्षा, व्यवस्थापन र विज्ञानतर्फ जीव विज्ञान तथा भौतिकशास्त्र पढाई हुने गरेको छ । साथै, यसै वर्षदेखि होटल म्यानेजमेन्टको पनि पढाई हुँदै आएको छ ।
Discussion about this post