इटहरी : कोशी प्रदेशमा सवारी चालकहरूको स्वास्थ्य परीक्षण गर्दा ११ जनाले लागूऔषध सेवन गरेको पाइएको छ ।
मंगलबार मोरङको बूढीगंगा गाउँपालिका ४ स्थित कोशी लोकमार्गमा सवारी चालक तथा सह–चालकहरूको स्वास्थ्य परीक्षण गर्दा ११ जनाले लागूऔषध सेवन गरेको पाइएको हो ।
जिल्ला प्रशासन कार्यालय मोरङ, जिल्ला प्रहरी कार्यालय मोरङ, जिल्ला ट्राफिक प्रहरी कार्यालय मोरङ र बूढीगंगा गाउँपालिका तथा विराट टिचिङ अस्पतालको सहकार्यमा सञ्चालन भएको स्वास्थ्य शिवरमा ५० जना सडक प्रयोगकर्ता, ५५ जना चालक तथा सहचालकहरूको स्वास्थ्य परीक्षण गरिएको थियो ।
जसमा ११ जना सवारी चालकहरूले लागूपदार्थ सेवन गरेको पुष्टि भएपछि आवश्यक कारबाहीको लागि नियन्त्रणमा लिइएको कोशी प्रदेश प्रहरी कार्यालय विराटनगरले जनाएको छ ।
कोशी प्रदेश प्रहरी प्रमुख प्रहरी नायव महानिरीक्षक (डीआईज)राजन अधिकारीको प्रमुख आतिथ्यता तथा जिल्ला प्रशासन कार्यालय मोरङका प्रमुख प्रेमप्रसाद भट्टराईको अध्यक्षतामा भएको कार्यक्रममा सडक सुरक्षा र दुर्घटना न्यूनीकरणका लागि सवारी चालक तथा सह–चालकहरूको स्वास्थ्य परीक्षण तथा लागूपदार्थ सेवन जाँच गरिएको थियो ।
डीआईजी अधिकारीले सवारी साधनले मानिसको दिनचर्यालाई सहज बनाउन अति आवश्यक भएको भएपनि सवारी साधनबाट हुने दुर्घटना ठूलो चुनौतीको रूपमा रहेको बताए ।
विविध कारणबाट हुने सवारी दुर्घटनाहरूमध्ये सबैभन्दा बढी चालकको लापरबाहीको कारणबाट भएको तथ्यांकले देखाउने बताउने उनले बताउ । तीमध्ये कतिपय दुर्घटनाहरू चालकको स्वास्थ्य अवस्था कमजोर भएर पनि हुने गरेको उनको भनाइ छ ।
Discussion about this post