इटहरी : कोशी प्रदेशका पूर्व मुख्यमन्त्री उद्वव थापालाई बाटो छेकेर हातपात भएको छ ।
गृह जिल्ला झापामा गएका थापा शनिबार नेपाल प्रेस युनियन झापाको साधारणसभामा सहभागी भएर फकिँदै गर्दा बाटो छेकेर हातपात भएको हो ।
नेपाली कांग्रेस कोशी प्रदेश सभापतिसमेत रहेका थापामाथि शनिबार साँझ साढे ५ बजेतिर जामुनबारी चोकस्थित जुकेखाडी नजिकै आक्रमण भएको कांग्रेस झापा सचिव कृष्ण हुमागाईँले पुष्टि गरे ।
बा १ झ ६५३ नम्बरको गाडीमा थापा सवार थिए । थापासँगै गाडीमा सवार रहेका हुमागाईंका अनुसार बा १ ञ १८७० का चालक भक्त कटवालले आक्रमण गरेका हुन् ।
उनले भने, ‘बाटोमा गाडीले छेकिरहेपछि साइड दिनका लागि रिक्वेस्ट गर्यौँ । साइड नदिएपछि हामी साइड लिएर अगाडि बढिरहेका थियौँ, अचानक स्पीडमा ल्याएर अगाडि बाटो छेकेपछि सभापति ज्यू ले पुनः साइड दिन आग्ह गरेपनि अचानक बक्सिङले हिर्काए ।’
उनका अनुसार पुनः बाटो छेकेपछि साइड दिन आग्रह गरेको भएपनि कटवालले बक्सिङले हिर्काएका थिए ।
झापाकै शिवसताक्षी ११ निवासी कटवालले दाहिने हातको बक्सिङले हिर्काउँदा थापाको देब्रे आँखाको माथिपट्टी चोट लागेको छ । त्यसलगत्तै उनलाई प्रहरीले नियन्त्रणमा लिएको छ ।
घटनापछि थापा उपचारका लागि बिर्तासिटी अस्पताल भर्ना भएका थिए । उनी सामान्य उपचारपछि घर फर्किएका छन् । पक्राउ परेका कटवालमाथि थप अनुसन्धान भइरहेको प्रहरीले जनाएको छ ।
Discussion about this post