इटहरी : धरान उपमहानगरपालिका ६ पाँचकन्या सामुदायिक वनमा मृत भेटिएकी महिलाको हत्यामा संलग्न रहेको आशंकामा प्रहरीले परिवारकै चार जनालाई नियन्त्रणमा लिएको छ ।
गत सोमबार हत्या गरेर फ्याँकिएको अवस्थामा फेला परेकी महिलाको हत्यामा परिवारकै सदस्य संलग्न रहेको आशंकामा प्रहरीले चार जनालाई पक्राउ गरेको हो ।
इटहरी उपमहानगरपालिका–२, हलगडामा बसोबास गर्दै आएकी ३४ वर्षीया चुनकुमारी दाहाल (बुढाथोकी)को हत्यामा परिवारभित्रकै सदस्यको संलग्नता रहेको निष्कर्षमा पुगेको हो ।
उनको हत्यामा परिवारकै संलग्नता रहेको पाइएपछि प्रहरीले अनुसन्धानका लागि मृतक महिलाको देवर, देउरानी र नन्दसहितलाई नियन्त्रणमा लिएको हो ।
अर्का १ जना व्यक्तिलाई पनि नियन्त्रणमा लिएर अनुसन्धान अगाडि बढाइएको प्रहरीले जनाएको छ ।
इलाका प्रहरी कार्यालय धरानका डीएसपी प्रकाश जबेगूले घटनाको अनुसन्धान भइरहेको बताए ।
घटनाको विषयमा सोधपुछका लागि केहीलाई नियन्त्रणमा लिइसकिएको भए पनि हत्यामा उनीहरूको संलग्नता छ कि छैन भनेर यकिन हुन बाँकी रहेकाले पहिचान तत्काल गोप्य राखिएको उनको भनाइ छ ।
मृतकका पति प्रेमबहादुर बुढाथोकी वैदेशिक रोजगारीका लागि कोरियामा छन् । कोरियाबाट आएर उनी करिब तीन महिना अघि पुनः कोरिया नै फर्किएका थिए ।
चुनकुमारीको हत्यामा श्रीमानसँगको खटपट पनि कारण देखिएको प्रहरी स्रोतले जनाएको छ । घटनाबारे प्रहरीले विभिन्न कोणबाट अनुसन्धान गरिरहेको छ ।
यो पनि – धरानको जंगलमा मृत भेटिएकी महिला इटहरीकी, घाँटी कसेर हत्या गरिएको आशंका
यो पनि – धरानमा महिलाको हत्या गरी जंगलमा फ्याँकेको आशंका, शव पहिचान गर्न प्रहरीको अपिल
Discussion about this post