मोरङ : ‘प्रहरी हुँ’ भनी सर्वसाधारणलाई नियन्त्रणमा लिई लुटपाट गर्ने गिरोहमाथि मोरङ प्रहरीले एक युवकलाई पक्राउ गरेको छ।
जिल्ला प्रहरी कार्यालय मोरङ र इलाका प्रहरी कार्यालय रानीको संयुक्त अनुसन्धानबाट घटनामा संलग्न समूहको पहिचान गरी पक्राउ गरिएको हो।
पक्राउ पर्नेमा विराटनगर–११ का २५ वर्षीय कुशल पाण्डे रहेका छन्। उनलाई बिहीबार विराटनगरबाट नियन्त्रणमा लिइएको हो।
प्रहरीले उनको साथबाट लुटिएको १ लाख ५० हजार रुपैयाँ, कालो ट्रयाकसुट र ट्राउजर बरामद गरेको जनाएको छ। पाण्डे माओवादी केन्द्रको भातृ संगठन वाईसीएल विराटनगरका पूर्व सदस्य हुन्। उनले राजनीतिक आवरण र संरक्षणमा विभिन्न अपराध गरेको खुलेको छ ।
यसअघि असार १५ गते विराटनगर–८ का २४ वर्षीय समीर हुसेन र विराटनगर–६ का २७ वर्षीय आशिफ अन्सारी लाई पक्राउ गरिएको थियो। उनीहरूलाई लुटपाटमा प्रयोग भएको को १४ प ३३३० नम्बरको रातो स्कुटरसहित पक्राउ गरिएको थियो।
प्रहरीका अनुसार घटना असार ११ गते बिहान ११ः१५ बजे विराटनगर–१५ का २० वर्षीय विक्रम कुमार साह तेली सवार सिटी सफारीमा भएको हो।
उनी बैंकमा जम्मा गर्न लैजाँदै गरेको ३ लाख ६४ हजार रुपैयाँ लिएर रानीस्थित राइस मिल नजिकै पुगेका बेला तीन जना अपरिचित व्यक्तिहरूले स्कुटर रोकेर आफूहरू जिल्ला प्रहरी कार्यालय मोरङबाट आएको अनुसन्धान टोली हौं भनी झूटो परिचय दिएर साहलाई नियन्त्रणमा लिएका थिए।
उनीहरू पीडितलाई जबरजस्ती स्कुटरको बीचमा राखी विराटनगर–१४ को एकान्त स्थानमा लगेर शरीर बन्धक बनाई नगद लुटपाट गरी फरार भएका थिए।
मोरङ प्रहरीका प्रहरी नायब उपरीक्षक हस्तबहादुर सुनारका अनुसार घटनामा संलग्न तीनै जनालाई शरीर बन्धक बनाई डकैती गरेको कसुर अन्तर्गत मोरङ जिल्ला अदालतबाट म्याद लिएर अनुसन्धान अघि बढाइएको छ।
पछिल्लोपटक पक्राउ परेका पाण्डे यसअघि पनि ज्यान मार्ने उद्योग र अभद्र व्यवहार मुद्दामा संलग्न रहेको प्रहरी अभिलेखले देखाएको छ।
पाण्डेविरुद्ध ज्यान मार्ने उद्योग र एउटा अभद्र व्यवहारको मुद्दा चलिसकेको अभिलेख रहेसँगै यो घटनामा सुक्ष्म अनुसन्धान अगाडि बढाइएको सुनारले जानकारी दिए।
Discussion about this post