धरान : स्थानीय सरकार सञ्चालन ऐन अन्तर्गत असार मसान्तभित्रै आगामी आर्थिक वर्षको बजेट पारित गर्नुपर्ने प्रावधान भएपनि धरान उपमहानगरले हालसम्म बजेट पेश गर्नसमेत सकेको छैन।
‘बजेट होलिडे’मा गएको एक महिनापछि उपमहानगरले बजेट प्रक्रिया अघि बढेको जनाएको छ। उपमहानगरले चालु आर्थिक वर्षका लागि २ अर्ब २० करोड रुपैयाँको बजेट ल्याउने तयारी गरेको छ।
उपमहानगरका प्रवक्ता तथा वडा नं. १७ का वडाध्यक्ष मनोजकुमार भट्टराई (सूर्य)का अनुसार बजेटको स्रोत तथा सीमा निर्धारण समितिले सिलिङ टुंग्याएर वडा तहमा पठाइसकेको छ। उपमहानगरका २० वडाका लागि कूल २१ करोड रुपैयाँको सिलिङ तोकिएको छ।
आगामी शुक्रबारसम्म वडाहरूले योजना टुंग्याउने समयसीमा दिइएको प्रवक्ता भट्टराईले बताए। वडाबाट योजना संकलन भएपछि कार्यपालिका बैठक बस्ने र त्यसपछि नगरसभाबाट बजेट पारित गरिने उनले जानकारी दिए।
तर, बजेटको स्रोत अनुमान तथा सीमा निर्धारण समितिमा नेकपा (एमाले)ले असहमति जनाएको थियो। धरान उपमहानगरपालिकामा एमालेको बहुमत भए पनि स्वतन्त्रबाट मेयर हर्क साम्पाङले नगरको नेतृत्व गरिरहेका छन्।
वडास्तरको योजना छनोट प्रक्रिया सकिएलगत्तै आउँदो आइतबार र सोमबार कार्यपालिका बैठक बस्ने र नगरसभा बोलाउने तयारी रहेको जनाइएको छ।
Discussion about this post