इटहरी : स्थानीय तह संस्थागत क्षमता स्वमूल्याङ्कनमा इटहरी उपमहानगरपालिका छैटौँ स्थानमा परेको छ ।
देशभर रहेका ११ उपमहानगरपालिकामध्ये इटहरीले ८० अंक प्राप्त गर्दै छैटौँ स्थान हासिल गरेको हो । अघिल्लो वर्ष ७९.२५ अंक ल्याएको इटहरी यस वर्ष अलि सुधारसहित अगाडि बढेको छ ।
धरान उपमहानगरपालिका भने आठौँ स्थानमा परेको छ । धरानले यसपटक ७७.५ अंक प्राप्त गरेको छ । अघिल्लो वर्ष ७०.७५ अंक ल्याएको धरानले यस वर्ष सात अंकभन्दा बढी सुधार गरेको देखिन्छ ।
उपमहानगरपालिकाहरुमध्ये बुटवलले ८८.५ अंक प्राप्त गर्दै पहिलो स्थानमा आएको छ । ८७ अंकसहित घोराही दोस्रो, ८६.२५ अंकसहित हेटौँडा तेस्रो, ८४ अंकसहित धनगढी चौथो, ८२ अंकसहित नेपालगञ्ज पाँचौँ, ८० अंकसहित इटहरी छैटौँ र ७९ अंकसहित तुलसीपुर सातौँ स्थानमा छन् ।
त्यस्तै ७६.५ अंकसहित कलैया नवौँ, ६५.२५ अंकसहित जितपुर–सिमरा दशौँ र ५०।२५ अंकसहित जनकपुर उपमहानगरपालिका एघारौँ स्थानमा परेका छन् ।
नेपाल सरकार संघीय मामिला तथा सामान्य प्रशासन मन्त्रालयले प्रत्येक वर्ष प्रकाशन गर्ने यस मूल्याङ्कनमा शासकीय प्रबन्ध, संगठन तथा प्रशासन, बजेट तथा योजना, वित्तीय व्यवस्थापन, सार्वजनिक सेवा प्रवाह, न्यायिक कार्यसम्पादन, भौतिक पूर्वाधार, सामाजिक समावेशीकरण, वातावरण तथा विपद् व्यवस्थापन र सहकार्य–समन्वय जस्ता १० वटा सूचकका आधारमा स्थानीय तहहरूको कार्यसम्पादन मूल्याङ्कन गरिन्छ ।
Discussion about this post