धरान : धरान क्षेत्रमा वितरण हुने जारको पानी गुणस्तरहीन भएको पाइएको छ।
सोमबार खाद्य प्रविधि तथा गुण नियन्त्रण कार्यालय विराटनगर, डिभिजन कार्यालय इनरुवा र धरान उपमहानगरपालिकाको संयुक्त टोलीले धरान प्रवेश गर्ने मुख्य नाका तीनकुनेमा अनुगमन गर्दा विभिन्न पाँच उद्योगका १५६ जार कुच्चिएका, फोहोर र लेवलविनाका भेटिएपछि तत्काल नष्ट गरिएको हो।
नष्ट गरिएका जारमध्ये इटहरी–२ स्थित गौमुखी गङ्गाजल प्रा.लि.का ५६, जय नेपाल जल उद्योग तरहराका ११, दिव्येश्वरी जल उद्योग तरहराका २०, पारिजात जल उद्योगका २९ र हलेसी एक्वा तरहराका ४१ वटा रहेको धरान उपमहानगरपालिकाका अधिकृत हिमाल गौतमले जानकारी दिए ।
उद्योगहरूलाई पुरानो जारमा पानी बिक्री नगर्न निर्देशन दिइएको छ। साथै, पानीको गुणस्तर परीक्षणका लागि विराटनगर पठाइएको र रिपोर्ट आएपछि कारबाही अघि बढाइने खाद्य प्रविधि तथा गुण नियन्त्रण कार्यालयले जनाएको छ।
कामै नलाग्ने जार तत्काल नष्ट गरेर लेवल नभए पनि प्रयोग गर्न मिल्ने जारहरू लेवल लगाएर मात्र बिक्री गर्न निर्देशन दिएर फिर्ता पठाइएको खाद्य प्रविधि तथा गुण नियन्त्रण डिभिजन कार्यालय सुनसरीका निरीक्षण अधिकृत उज्वल कोइरालाले बताए।
Discussion about this post