भोजपुर : भोजपुर सदरमुकामलाई उत्तरी क्षेत्रसँग जोड्ने भोजपुर–दिङ्ला ३३ दशमलव ५ किलोमिटर सडक कालोपत्रे थालिएको छ ।
कोशी प्रदेश सरकारको रु एक अर्ब २२ करोड ३२ लाख लागतमा दुई खण्डमा कालोपत्रेको काम थालिएको हो ।
पहिलो खण्ड भोजपुर दिङला तीनतले १७ दशमलव ५ किलोमिटर सडक रु ५८ करोड ४० लाख १५ हजार ५६१ रुपैयाँ लागतमा काम भइरहेको छ ।
विसं २०८० मङ्सिरमा महिनाबाट सम्झौता भएर काम सुरु गरिएको यो सडक २०८२ मङ्सिर महिनामा सम्पन्न गर्नु पर्ने सम्झौता रहेको छ ।
यो सडकको भौतिक प्रगति ४५ प्रतिशत हाराहारीमा रहेको पूर्वाधार विकास कार्यालय भोजपुरले जनाएको छ ।
दोस्रो खण्ड भोजपुर–दिङ्ला–तीनतले–दिङ्ला १६ किलोमिटर सडक रु ६३ करोड ९२ लाख ६२ हजार ७६१ लागतमा निर्माण भइरहेको छ ।
विसं २०८० पुस महिनामा सम्झौता भएको यो सडकको २०८२ पुस महिनामा सम्पन्न गर्ने गरी काम भइरहेको पूर्वाधार विकास कार्यालय भोजपुरका प्रमुख राजनराज रेड्डीले जानकारी दिए ।
यो सडकको भौतिक प्रगति २० प्रतिशत रहेको छ । यी दुवै सडक आस्फाल्ड प्रविधिबाट कालोपत्रे हुने प्रमुख रेड्डीको भनाइ छ ।
“भोजपुर–दिङ्ला सडक कालोपत्रेको काम दुई खण्डमा भइरहेको छ”प्रमुख रेड्डीले भने, “यो सदरमुकामलाई उत्तरी क्षेत्र जोड्ने महत्त्वपूर्ण सडक पनि हो । सडक निर्माणलाई प्राथमिकताका साथ अघि बढाएका छौँ ।”
सडक कालोपत्रेको कामले तीव्रता पाएपछि उत्साह बढेको षडानन्द १० का स्थानीय निमा शेर्पाले बताए ।
सडक कालोपत्रे भएपछि यहाँका कृषि उपजको बजारीकरणसँगै षडानन्द नगरपालिका र साल्पासिलिछो गाउँपालिकाका नागरिकलाई सहजता हुने उनको भनाइ छ ।
सडक कालोपत्रे भएपछि वर्षातको समयमा सङ्खुवासभा जिल्ला घुमेर भोजपुर सदरमुकाम जानु पर्ने बाध्यताको समेत अन्त्य हुने उनले जानकारी दिए ।
यो सडक कालोपत्रे भएपछि उत्तरी क्षेत्रका नागरिकलाई सहजता हुने षडानन्द नगरपालिका प्रमुख सुरेन्द्रकुमार उदासले बताए ।
सडकलाई निर्धारित समयमा गुणस्तरीय ढङ्गले सम्पन्न गराउन नगरले आवश्यक भूमिका खेलिरहेको उनको भनाइ छ ।
“यो उत्तरी क्षेत्रको लागि महत्त्वपूर्ण सडक हो” प्रमुख उदासले भने “सडक कालोपत्रे हुने गरी काम थालिएपछि स्थानीयमा उत्साह बढेको छ । कालोपत्रेको कामलाई गुणस्तरीय ढङ्गले समयमा सम्पन्न गराउन नगरले आवश्यक भूमिका खेलिरहेको छ ।”
सडकको पहिलो खण्डको निर्माणको जिम्मा निर्माण कम्पनीले लिएका छन् ।
Discussion about this post