विराटनगर : जेनजी आन्दोलनका क्रममा अराजक समूहले विराटनगर महानगरपालिकामा तोडफोड, लुटपाट र आगजनी गरेपछि कार्यालय खण्डहरमा परिणत भएको छ ।
आगजनीका कारण नक्साफाट, राजस्वा फाट, घरजग्गा फाटलगायतका महत्वपूर्ण कागजात पूर्णरूपमा नष्ट भएका छन् ।
महानगरका प्रमुख प्रशासकीय अधिकृत योगेन्द्रप्रसाद दुलालका अनुसार उपप्रमुख शिल्पा निरला कार्कीको कार्यकक्षबाहेक बाँकी सबै कक्ष ध्वस्त छन् । “करिब शून्य अवस्थामा पुगेको कार्यालय तत्काल सेवा दिन असमर्थ छ,” उनले भने।
महानगरपालिकाले सूचना जारी गर्दै स्वास्थ्य, दमकल र सरसफाइबाहेकका सबै सेवा अर्को सूचना नआएसम्मका लागि स्थगित गरेको जनाएको छ ।
डोजर, मिनि ट्रक, फोहोर बोक्ने गाडी, विद्युत् गाडी लगायत आपतकालीन सवारीसाधन पनि जलेर ध्वस्त भएका छन् ।
महानगरले सोमबारदेखि क्षतिको विवरण संकलन सुरु गर्ने भएको छ । कर्मचारीका टेबल, कुर्सीदेखि अभिलेखसम्म खरानी बनेपछि अन्योलमा परेको महानगरले जनाएको छ ।
Discussion about this post