इटहरी : राष्ट्रिय जागृति क्लब (राजा) इटहरीको अध्यक्षमा केशव कार्की चुनिएका छन् ।
तत्कालीन अध्यक्ष सन्तबहादुर डुम्जनको कार्यकाल सकिएसँगै आइतबार कार्कीलाई अध्यक्षको जिम्मेवारी दिएको हो ।
लामो समयदेखि फुटबल खेलको श्रीवृद्धि र युवा प्रतिभा विकासका लागि सक्रिय रहँदै आएका कार्कीले क्लबको नेतृत्व सम्हालेसँगै खेल क्षेत्रलाई थप सशक्त र व्यवस्थित रूपमा अघि बढाउने प्रतिबद्धता जनाएका छन् ।
उनले आफ्नो कार्यकालमा स्थानीयस्तरमा खेल पूर्वाधार निर्माण, प्रतिभावान खेलाडीको पहिचान र प्रोत्साहन, साथै ग्रासरुट फुटबललाई प्राथमिकता दिने योजना अगाडि सारेका छन् ।
वि.सं. २०२३ सालमा स्थापना भएको राजा क्लबका नवनिर्वाचित अध्यक्ष कार्कीले भने, ‘राष्ट्रिय जागृति क्लब इटहरीले विगतमा फुटबल क्षेत्रको विकासमा महत्वपूर्ण भूमिका खेलेको छ । अबको नेतृत्वमा हामी अझ सशक्त कार्यक्रम र योजना सहित अगाडि बढ्नेछौं । खेलकुदले समाजमा एकता र सकारात्मक सोच फैलाउँछ । त्यसैले हामी खेलकुदलाई विकास र समृद्धिको माध्यमका रूपमा अघि बढाउनेछौं।’
नयाँ समितिको कार्यकाल तीन वर्षको रहनेछ ।
क्लबका पूर्वअध्यक्ष डुम्जनले नयाँ नेतृत्वलाई शुभकामना दिँदै आफ्नो कार्यकालमा सहयोग गर्ने सबैप्रति धन्यवाद ज्ञापन गरेका छन् ।
उनले नयाँ नेतृत्वबाट क्लबले अझै राम्रो उपलब्धि हासिल गर्ने विश्वास व्यक्त गरे ।
राष्ट्रिय जागृति क्लब इटहरीले पछिल्ला वर्षहरूमा बालबालिका र युवाहरूलक्षित फुटबल प्रशिक्षण कार्यक्रम, अन्तराष्ट्रिय स्तरको फुटबल प्रतियोगिता आयोजना गर्दै आएको छ ।
क्लबले इटहरी र आसपासका क्षेत्रमा फुटबल खेलप्रतिको आकर्षण बढाउन उल्लेखनीय योगदान दिएको छ ।
Discussion about this post