विराटनगर : कोशी प्रदेश सरकारका मुख्यमन्त्री हिक्मत कुमार कार्की र स्विस सरकारका स्विस डेभलपमेन्ट कोअपरेसनका असिस्टेन्ट डाइरेक्टर आर्नो विकीबीच सोमवार मुख्यमन्त्री तथा मन्त्रिपरिषद्को कार्यालयमा भेटवार्ता भएको छ।
भेटका क्रममा द्विपक्षीय सहयोग, संघीयता कार्यान्वयन, रोजगारी उत्पादन, पर्यटन विकास र जलवायु परिवर्तन लगायत विषयमा विस्तृत छलफल भएको मुख्यमन्त्री कार्यालयले जनाएको छ।
मुख्यमन्त्री कार्कीले संघीयता संस्थागत गर्न स्विस सरकारले दीर्घकालीन प्राविधिक तथा वित्तीय सहयोग प्रदान गर्दै आएको उल्लेख गर्दै धन्यवाद व्यक्त गरे ।
उनले भने, ‘स्विस सरकारको सहयोगका कार्यक्रम चरणबद्ध रूपमा अघि बढिरहेमका छन्। यसको ठोस परिणाम छिट्टै देखिनेछ।’
कार्कीले जलवायु परिवर्तन अनुकूलन, रोजगारी सिर्जना र स्थानीय आर्थिक विकासमा सहकार्यलाई अझ सुदृढ गर्नुपर्नेमा जोड दिए।
सो अवसरमा स्विस डेभलपमेन्ट कोअपरेसनका असिस्टेन्ट डाइरेक्टर विकीले कोशी प्रदेशलाई उच्च सम्भावनायुक्त प्रदेशका रूपमा प्रस्तुत गर्दै पर्यटन, कृषि तथा भौतिक पूर्वाधारका क्षेत्रमा साझेदारीमा कार्य अगाडि बढाउन सकिने धारणा राखे।
उनले भने, ‘कोशी सुन्दर र शान्त प्रदेश हो। यहाँका मानिसहरू मिलनसार तथा मेहनती छन्। यसले सहकार्यलाई अझ सहज बनाउँछ।’
उनले नेपाल र स्विजरल्यान्डबीचको मित्रता र लोकतन्त्रको साझा मूल्यले दुई देशबीचको साझेदारीलाई मजबुत बनाइरहेको पनि बताए।
भेटवार्तामा स्विस सरकारका कोपरेसन म्याथियस माएरसहितको प्रतिनिधि टोलीको उपस्थिति थियो।
Discussion about this post