इटहरी : नेकपा (एमाले) कोशी प्रदेश कमिटीबाट कारबाहीमा परेका इटहरी उपमहानगरपालिकाका पूर्वमेयर तथा प्रदेश कमिटी सदस्य द्वारिकलाल चौधरीले सत्य कुरा तीतो हुने बताएका छन् ।
अनुशासन उल्लंघन गरेको आरोपमा कारबाहीमा परेपछि प्रतिक्रिया दिँदै चौधरीले पार्टीभित्र गुटबन्दी र दुराग्रहका कारण आफूलाई निशाना बनाइएको बताए ।
उनले भने, ‘मैले केपी ओलीको कार्यशैलीको आलोचना गर्दै आएको थिएँ। पार्टीभित्र गुटबन्दी छ, त्यो छर्लङ्ग छ। तर, महाधिवेशन नजिकिँदै गर्दा प्रतिनिधि छान्ने, नेतृत्व छान्ने अधिकार कैद गर्न ममाथि दुराग्रह राखियो ।’
पार्टी कोशी प्रदेश कमिटीको नवौं पूर्ण बैठकले चौधरीलाई ६ महिनाका लागि पार्टी सदस्यता निलम्बन गर्दै जिम्मेवारीबाटसमेत मुक्त गरेको थियो। चौधरीले सामाजिक सञ्जाल र मिडियामा ओलीविरूद्ध टिप्पणी गरेका थिए।
कारबाही प्रक्रियालाई नियोजित देखिने बताउँदै चौधरीले भने, ‘यत्रो समयसम्म कारबाही नगर्ने, तर महाधिवेशनको पूर्वसन्ध्यामा कारबाही गरिनुले महाधिवेशनमा वञ्चित गर्न खोजेको स्पष्ट छ। महाधिवेशनको प्रक्रियामा सामेल हुनै नदिने माहोल बनाइयो, तिथि–मिति तोकिसकिएको अवस्थामा यस्तो गर्नु ठीक भएन।’
चौधरीले आफूले कहिलेकाहीँ राम्रो सल्लाह दिन खोज्दा पनि त्यसलाई गलत अथ्र्याइने गरेको गुनासो गरे। ‘सत्य कुरा तीतो हुन्छ। पार्टी नेतृत्वकै हितमा कुरा गरे पनि नबुझेजस्तो गरिन्छ,’ उनले भने।
प्रदेश कमिटीले कारबाही गरेपनि केन्द्रीय कमिटीको अनुशासन समितिले सिफारिस नगरिएकाले कारबाही फिर्ता हुने उनको जिकिर छ। ‘मलाई विश्वास छ, नेतृत्वले कारबाही फिर्ता लिन्छ। यस्तो निर्णय माथिल्लो कमिटीको पनि अनुशासन समितिले अनुमोदन गर्नुपर्छ, त्यसैले अन्तिममा न्याय हुने अपेक्षा छ,’ उनले थपे।
खासगरी आफूमाथि पूर्वाग्रह राखिएको र केही सीमित व्यक्तिको स्वार्थसिद्ध आफूले काम नगरेकोमा कारबाहीको डन्डा सोझ्याइएकोमा उनको आपत्ति छ।
‘मैले केपी ओलीको कार्यशैलीको आलोचना गर्दै आएको थिएँ। अब महाधिवेशन आयो, प्रतिनिधि छान्ने, केन्द्रीय कमिटि छान्ने अधिकार राख्छ भनेर दुराग्रह राखियो,’ चौधरीले फोन सम्पर्कमा टाकुरा न्यूजसँग भने, ‘कहिलेकाहीँ राम्रै सल्लाह दिन खोज्यो भने सत्य कुरा तीतो हुन्छ । मलाई के विश्वास छ भने नेतृत्वले कारबाही फिर्ता लिन्छ ।’
चौधरीलाई कारबाही गर्दा इटहरी निवासी प्रा.डा. बद्रीविशाल पोखरेल र काशीनाथ दंगाललाई सार्वजनिक रूपमा पार्टी हितविपरीत गतिविधि गरेको भन्दै स्पष्टीकरण सोधिएको छ।
उता, झापाका मनोरथ तिवारीलाई पार्टीविरोधी कार्यका कारण र ध्रुब शिवाकोटीलाई अदालतबाट फौजदारी सजाय भएका कारण पदमुक्त गरिएको छ।
शिवाकोटीले आफ्नै धर्म छोरीलाई बलात्कार गरेको आरोप लागेपनि पार्टीले संरक्षण गर्दै आएको थियो ।
Discussion about this post