इटहरी : लागूऔषध ओसारपसार तथा कारोबार भइरहेको विशेष सूचनाको आधारमा खटिएको प्रहरी टोलीले सुनसरीको रामधुनी नगरपालिका–१, पश्चिम बस स्टे–शनबाट ब्राउनसुगरसहित इटहरीका तीन जनासहित चार जनालाई नियन्त्रणमा लिएको छ।
मंगलवार दिउँसो लागूऔषध नियन्त्रण ब्यूरो, विराटनगर तथा इलाका प्रहरी कार्यालय पकली, सुनसरीबाट खटिएको संयुक्त प्रहरी टोलीले उक्त क्षेत्रमा शंकास्पद रूपमा एकआपसमा कुराकानी गरिरहेका व्यक्तिहरूलाई चेकजाँच गरेको हो।
प्रहरीका अनुसार नियन्त्रणमा लिइएकामध्ये सुनसरीको कोशी गाउँपालिका–५ बस्ने ३६ वर्षीय साहबुदिन आलम, इटहरी उप–महानगरपालिका–१८ बस्ने २० वर्षीय मोहमद साबिर, सोही ठाउँका २४ वर्षीय रहमत अली र सोही ठाउँकै २४ वर्षीय मोहमद असलम रहेका छन्।
कानुन बमोजिम खानतलासी गर्दा मोहमद असलमको साथबाट ब्राउन सुगरजस्तो १४१.४६० ग्राम (एक सय एकचालीस ग्राम, चार सय साठी मिलिग्राम) फेला परेको प्रहरीले जनाएको छ।
चारैजनालाई लागूपदार्थसहित नियन्त्रणमा लिएर इलाका प्रहरी कार्यालय पकलीमा राखी थप अनुसन्धान भइरहेको प्रहरीले जनाएको छ ।
Discussion about this post