इटहरी : नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीले आवश्यक कागजात नभएका पाँच वटा सवारी साधन नियन्त्रणमा लिई कानुनी कारबाहीका लागि राजस्व अनुसन्धान कार्यालय इटहरीमा बुझाएको छ।
ट्राफिक प्रहरीले नियमित चेकजाँचका क्रममा सवारी नम्बर, चेसिस नम्बर र इन्जिन नम्बर परिवर्तन गरी कानूनविपरीत रूपमा ताप्लेजुङका भित्री सडक खण्डमा सञ्चालन भइरहेका महेन्द्रा कम्पनीका पाँच वटा बोलेरो जीप नियन्त्रणमा लिएको हो।
नियन्त्रणमा लिइएका बोलेरो जीपमा प्रयोग भएका सवारी नम्बर, चेसिस नम्बर तथा इन्जिन नम्बर यातायात व्यवस्था कार्यालयको अभिलेखमा फेला नपरेपछि ती सवारी साधन अवैध रूपमा सञ्चालनमा रहेको पुष्टि भएको प्रहरीले जनाएको छ। त्यसपछि आवश्यक कानुनी कारबाहीका लागि उक्त सवारी साधनहरू राजस्व अनुसन्धान कार्यालय इटहरीमा बुझाइएको हो।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीले सवारी चोरी नियन्त्रण, अवैध कारोबार रोकथाम तथा सुरक्षित सडक निर्माणका लागि नियमित रूपमा सवारीको नम्बर प्लेट, चेसिस नम्बर, इन्जिन नम्बर तथा कागजातको कडाइका साथ चेकजाँच गर्दै आएको जनाएको छ। साथै, प्रहरीले सवारी धनीहरूलाई सवारी साधनका कागजात सुरक्षित राख्न र पार्किङ गर्दा विशेष सावधानी अपनाउन आग्रह गरेको छ।
Discussion about this post