इटहरी : तेस्रो इन्टर कलेज टी–२० क्रिकेट प्रतियोगिताअन्तर्गत बिहीवार सम्पन्न पहिलो खेलमा जनता बहुमुखी कलेज इटहरीले विश्व आदर्श कलेज ‘बी’ लाई पराजित गरेको छ।
जनताले टस जितेर पहिले ब्याटिङ गर्दै निर्धारित २० ओभरमा ९ विकेट गुमाएर १४९ रन बनायो। जनताको ब्याटिङतर्फ उज्वल श्रेष्ठले ३०, आभास गेलालले २७, निमा तामाङले २५ तथा सुमन पौडेलले २५ रनको योगदान दिए।
बलिङतर्फ विश्व आदर्श कलेजका पल सिग्देल र चिरञ्जीवी शाहले समान ३–३ विकेट लिए।
१५० रनको लक्ष्य पछ्याएको विश्व आदर्श कलेज ‘बी’ १७ ओभरमै सबै विकेट गुमाउँदै १०३ रनमै सीमित भयो।
आजकै दोस्रो खेलमा आस्था कलेज दमकले पूर्वाञ्चल इन्जिनियरिङ कलेज धरानलाई सहज रूपमा पराजित गरेको छ।
पूर्वाञ्चलले टस जितेर पहिले ब्याटिङ गरे पनि १६ ओभरमै सबै विकेट गुमाउँदै ७८ रन मात्रै जोड्न सक्यो। अजित अटलले १७, विवश भण्डारीले १३ र काँशी सन्जेलले १२ रन बनाए।
आस्थाका बलर सुगम बुढाथोकीले ३ विकेट लिए भने छबिलाल खड्का, रञ्जन धमला र सौजन्य घिमिरेले समान २–२ विकेट लिए। आशिष रानाले १ विकेट लिए।
७९ रनको लक्ष्य आस्थाले ११ ओभरमा ४ विकेट गुमाउँदै पूरा गर्यो। सन्तोष गजमेरले १७, भुपाल दङ्गालले १५ र हिमान्शु गिरीले ११ रन बनाए।
पूर्वाञ्चलका अजित अटलले २ विकेट लिँदा कासी सन्जेल र अनुपम भुजेलले समान १–१ विकेट लिए।
खेलको ‘म्यान अफ द म्याच’ आस्था कलेजका सुगम बुढाथोकी घोषित भए।
यससँगै विश्व आदर्श कलेज ‘ए’ इटहरी, कान्तिपुर कलेज विराटनगर, नमुना कलेज इटहरी र आस्था कलेज दमक सेमिफाइनलमा प्रवेश गरेका छन्। सेमिफाइनल खेल शुक्रवार हुने आयोजकले जनाएको छ।
शनिवारसम्म चल्ने प्रतियोगितामा कोशी प्रदेशका झापा, मोरङ र सुनसरीका १२ कलेज सहभागी छन्। विजेताले २५ हजार र उपविजेताले १५ हजार रुपैयाँ पुरस्कार प्राप्त गर्नेछन्।
प्रतियोगिता सुनसरी जिल्ला क्रिकेट संघको प्राविधिक सहयोगमा सञ्चालन भइरहेको छ।
Discussion about this post