इटहरी : ध्वनी प्रदूषण नियन्त्रण तथा सडक सुरक्षालाई प्राथमिकतामा राख्दै नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीले स्वरूप परिवर्तन गरी अत्यधिक आवाज निकाल्ने मोटरसाइकलविरुद्ध विशेष चेकिङ अभियान सञ्चालन गरेको छ।
पूर्व–पश्चिम लोकमार्ग (एशियन हाइवे), कोशी राजमार्ग तथा इटहरी उपमहानगरपालिका क्षेत्रभित्र सञ्चालन गरिएको अभियानका क्रममा अवैध रूपमा स्वरूप परिवर्तन गरिएका १० वटा मोटरसाइकल नियन्त्रणमा लिइएको प्रहरीले जनाएको छ।
नियन्त्रणमा परेकामध्ये रोयल इन्फिल्ड ब्रान्डका ९ थान र पल्सर एनएस मोडलको १ थान मोटरसाइकल रहेको छ।
ट्राफिक प्रहरीकाअनुसार ती मोटरसाइकलहरूमा कम्पनीद्वारा स्वीकृत मापदण्डविपरीत साइलेन्सर परिवर्तन गरी अत्यधिक ध्वनी निकाल्ने बनाइएको थियो। यस्ता स्वरूप परिवर्तनले सर्वसाधारणलाई असहज बनाउनुका साथै पैदलयात्री, वृद्धवृद्धा, बालबालिका तथा बिरामी व्यक्तिहरूको स्वास्थ्यमा प्रतिकूल असर पर्ने भएकाले कारबाही गरिएको हो।
नियन्त्रणमा लिइएका मोटरसाइकलहरूमा गरिएको अवैध परिवर्तन तत्काल हटाइ मूल स्वरूपमा फर्काउन लगाइएको छ।
त्यसपछि सवारी तथा यातायात व्यवस्था ऐन अनुसार सम्बन्धित चालकहरूलाई आवश्यक ट्राफिक कारबाही गरिएको कार्यालयले जनाएको छ। कारबाही पश्चात चालकहरूलाई अभिभावकको उपस्थिति तथा रोहवरमा जिम्मा लगाइएको छ।
ट्राफिक प्रहरीका अनुसार पछिल्लो समय युवावर्गमा मोटरसाइकलको स्वरूप परिवर्तन गरी ‘लाउड साउन्ड’ निकाल्ने प्रवृत्ति बढ्दै गएको छ।
जसका कारण ध्वनी प्रदूषण मात्र नभई सडक दुर्घटनाको जोखिमसमेत बढिरहेको छ। तीव्र आवाजका कारण अन्य सवारी चालकहरू तर्सिने, संकेत सुन्न नसक्ने तथा अचानक ब्रेक लाग्दा दुर्घटना हुन सक्ने जोखिम रहने प्रहरीको भनाइ छ।
प्रहरीले आगामी दिनहरूमा पनि ध्वनी प्रदूषण गर्ने, ट्राफिक नियम उल्लंघन गर्ने तथा सवारी साधनको स्वरूप परिवर्तन गरी सडकमा चलाउनेहरूविरुद्ध निरन्तर निगरानी र कडाइका साथ कारबाही गरिने जनाएको छ।
साथै सवारी चालकहरूलाई कानुन पालना गर्न, सवारी साधनको मूल स्वरूप कायम राख्न र सुरक्षित तथा जिम्मेवार ढंगले सवारी चलाउन आग्रह गरिएको छ।
Discussion about this post