विराटनगर : पूर्वी नेपालमा क्यान्सर उपचारको दायरा विस्तार गर्ने उद्देश्यसहित विराट क्यान्सर इन्स्टिच्युटको आयोजनामा ‘विराट क्यान्सर सिम्पोजियम २०२६’ सफलतापूर्वक सम्पन्न भएको छ।
विश्व क्यान्सर दिवसलाई लक्षित गरी आयोजित सिम्पोजियमले पूर्वी नेपालको स्वास्थ्य क्षेत्रमा महत्वपूर्ण योगदान पुर्याउने आयोजकले जनाएको छ।
सिम्पोजियममा जटिल क्यान्सर केसहरूको सफल उपचार अनुभव आदान–प्रदान गरिएको थियो। क्यान्सर उपचारमा देखिएका चुनौती, आधुनिक प्रविधिको प्रयोग, नवीन उपचार पद्धति तथा क्लिनिकल अभ्यासमा आएका नयाँ शोधबारे विशेषज्ञहरूबीच गहन छलफल भएको थियो।
साथै, बहु–विषयक उपचार दृष्टिकोणलाई प्रभावकारी रूपमा लागू गर्ने विषयमा विभिन्न प्रस्तुति दिइएको थियो।
आयोजकका अनुसार पूर्वी नेपालमा क्यान्सर उपचारलाई केवल ‘रेडियसन’ मा सीमित नराखी बहु–विषयक पहुँचसम्म विस्तार गर्दै बिरामीलाई गुणस्तरीय तथा विश्वस्तरीय सेवा प्रदान गर्नु कार्यक्रमको मुख्य लक्ष्य रहेको छ।
नेपाल मेडिकल एसोसिएसनका केन्द्रीय अध्यक्ष डा. अनिल विक्रम कार्कीले पूर्वी नेपालमा विगत पाँच वर्षमा क्यान्सर उपचारमा उल्लेखनीय फड्को मारिएको उल्लेख गर्दै भने, “स्वास्थ्य र क्यान्सर उपचारको क्षेत्रमा सरकारले गर्न नसकिरहेको अवस्थामा निजी क्षेत्रबाट राम्रो सेवा दिइनु सकारात्मक पक्ष हो। विराट क्यान्सर इन्स्टिच्युटले छोटो समयमै धेरै क्यान्सर बिरामीको सफल उपचार गरेको देख्दा खुसी लाग्छ।”
भरतपुर क्यान्सर अस्पतालका एक्जुकेटिभ डाइरेक्टर तथा वरिष्ठ क्यान्सर रोग विशेषज्ञ डा. उज्ज्वल चालिसेले क्यान्सर उपचार बहु–विषयक प्रयासबाट मात्र सम्भव हुने बताए।
“क्यान्सरको उपचार एकजना चिकित्सकले मात्रै सम्भव हुँदैन, विभिन्न विषयका चिकित्सकहरूबीच समन्वय हुँदा मात्र सफल उपचार सम्भव हुन्छ,” उनले भने।
सिम्पोजियमका प्रोग्राम को–अर्डिनेटरका रूपमा प्रो. डा. नरेन्द्र पण्डित, डा. अस्मिता रायमाझी, डा. राहुल महतो, डा. प्रेरणा अर्ज्याल काफ्ले र डा. भरतमणी पोखरेल रहेका थिए।
कार्यक्रममा विराट मेडिकल कलेज टिचिङ हस्पिटलका संस्थापक अध्यक्ष डा. ज्ञानेन्द्रमान सिंह कार्की, नेपाल मेडिकल एसोसिएसनका अध्यक्ष डा. अनिल विक्रम कार्की, डा. उज्ज्वल चालिसे, डा. प्रभु प्रसाद शाह, डा. अम्बुज कर्ण, डा. देजकुमार गौतम लगायतका क्यान्सर रोग विशेषज्ञहरूको सहभागिता रहेको थियो।
Discussion about this post