झापा : झापाको शिवसताक्षी नगरपालिकामा फाइबर नेट जडानका लागि खाल्डो खन्ने क्रममा माटोको ढिस्कोले पुरिएर एक जना मजदुरको मृत्यु भएको छ।
मृत्यु हुनेमा सिरहाको लाहान नगरपालिका घर भई हाल शिवसताक्षी नगरपालिका-८ मा एनसेलको फाइबर नेट जडान कार्यमा संलग्न अन्दाजी ३५ वर्षीय रमेशकुमार यादव रहेका छन्।
प्रहरीका अनुसार शुक्रबार दिउँसो करिब २ः१० बजे शिवसताक्षी नगरपालिका-११ स्थित सतासी खोलाको शाखा कल्भर्ट नजिक एनसेलको फाइबर जडानका लागि बनाइएको भूमिगत खाल्डोभित्र पसेर काम गरिरहेका बेला अचानक माटोको ढिस्को खसेको थियो।
ढिस्कोले पुरिएर गम्भीर घाइते भएका यादवलाई तत्काल स्थानीयको सहयोगमा उद्धार गरी एम्बुलेन्समार्फत दमक अस्पताल पुर्याइएको थियो।
अस्पताल पुर्याए लगत्तै उपचारका क्रममा दिउँसो ३ः३५ बजे चिकित्सकले उनलाई मृत घोषणा गरेका प्रहरीले जनाएको छ। घटनाबारे थप अनुसन्धान भइरहेको छ।
Discussion about this post