इटहरी : राष्ट्रिय प्राकृतिक स्रोत तथा वित्त आयोगले सार्वजनिक गरेको स्थानीय तहहरूको कार्यसम्पादन मूल्याङ्कन प्रतिवेदनमा इटहरी उपमहानगरपालिका सबैभन्दा कमजोर देखिएको छ ।
आयोगका अनुसार इटहरीले ३८.९६ अङ्क मात्रै प्राप्त गर्दै देशभरका उपमहानगरपालिकामध्ये अन्तिम स्थानमा परेको हो।
प्रतिवेदनअनुसार उपमहानगरपालिकाहरूको समग्र कार्यसम्पादन अपेक्षाकृत कमजोर रहेको उल्लेख गरिएको छ ।
आयोगले स्रोत परिचालन, बजेट व्यवस्थापन, योजना छनोट तथा कार्यान्वयन, सार्वजनिक सेवा प्रवाह र वित्तीय अनुशासनका आधारमा मूल्याङ्कन गरेको हो।
इटहरीसँगै धरान उपमहानगरपालिका ४९.७६ अङ्कसहित औसतभन्दा कम कार्यसम्पादनमा परेको छ ।
आयोगको मूल्याङ्कनले सुनसरी जिल्लाका दुवै उपमहानगरपालिकाको कार्यसम्पादनमा सुधार आवश्यक रहेको देखाएको छ।
आयोगका अनुसार कार्यसम्पादन कमजोर भएका स्थानीय तहले आगामी आर्थिक वर्षमा प्राप्त गर्ने समानीकरण तथा सशर्त अनुदानमा प्रत्यक्ष वा अप्रत्यक्ष प्रभाव पर्न सक्नेछ ।
यसले इटहरी उपमहानगरपालिकामाथि आर्थिक व्यवस्थापन र विकास योजना कार्यान्वयनमा तत्काल सुधार गर्न दबाब बढेको छ।
प्रतिवेदन सार्वजनिक भएसँगै इटहरी उपमहानगरपालिकाको प्रशासनिक क्षमता, बजेट खर्चको अवस्था र विकास योजनाको प्रभावकारितामाथि प्रश्न उठेको छ।
खासगरी उपमहानगरपालिकाहरूको कार्यसम्पादनमा रुपन्देहीको बुटवल उपमहानगरपालिकाले ६४.४४ अङ्क प्राप्त गर्दै पहिलो भएको छ।
दाङका दुई उपमहानगरपालिकाहरू तुल्सीपुर ६१.५३ अङ्क र घोराही ६१.०८ अङ्क क्रमशः दोस्रो र तेस्रो स्थानमा रहेका छन्। कैलालीको धनगढी ५६.६०, बाँकेको नेपालगन्ज ५६.५४ अङ्क ल्याएका छन्।
मकवानपुरको हेटौँडाले ५४.१३ र धनुषाको जनकपुरधाम उपमहानगरपालिकाले ५१.५८ अङ्क ल्याउँदै औसत मात्रै कार्यसम्पादन गरेका छन्। बाराको कलैया ४९.५७ र जीतपुर सिमरा उपमहानगरपालिका ४८.३९को प्राप्ताङ्क ल्याउँदै औसतभन्दा पनि कम कार्यसम्पादनमा अङ्क ल्याएका छन्।
Discussion about this post