इटहरी : कम्प्युटर इन्जिनियरिङका विद्यार्थीहरूले समाजमा बढ्दै गएको डिजिटल असुरक्षालाई मध्यनजर गर्दै समुदायमा सचेतना अभियान सुरु गरेका छन्।
एसओएस हर्मन माइनर विद्यालय, इटहरीमा कक्षा ११ मा अध्ययनरत प्राविधिक धारका विद्यार्थीहरूको सक्रियतामा शनिबार इटहरी–५ मा सामाजिक सञ्जालको सुरक्षित प्रयोग विषयक सामुदायिक छलफल कार्यक्रम आयोजना गरिएको हो।
इटहरी उपमहानगरपालिका वडा नं. ५ का वडाध्यक्ष भीष्मकुमार घिमिरेले सामाजिक सञ्जालले मानिसको व्यक्तिगत जीवन मात्र नभई राष्ट्रिय सुरक्षामा समेत प्रभाव पारिरहेको बताए।
यस्तो संवेदनशील विषयमा प्राविधिक शिक्षा पढ्ने युवाहरूले देखाएको सक्रियता प्रशंसनीय रहेको उनले बताए।
उनले विद्यालय परिवारलाई यस्तो रचनात्मक र चेतनामूलक कार्यक्रम आयोजना गरेकोमा विशेष धन्यवाद समेत ज्ञापन गरे।
कार्यक्रममा इलाका प्रहरी कार्यालय इटहरीका इन्स्पेक्टर तोरण परियारले साइबर सुरक्षाका चुनौतीहरूबारे विशेष प्रस्तुति दिएका थिए । मुख्य गरी सहभागीहरूसँग साइबर अपराध, साइबर कानुन, सुरक्षित उपयोगलगायत विषयमा छलफल गरेका थिए।
प्रस्तुतिपछि भएको अन्तरक्रियामा स्थानीय बासिन्दा र विद्यार्थीहरूले राखेका जिज्ञासाको इन्स्पेक्टर परियारले स्पष्ट पारेका थिए ।
आजको समाजले प्रविधिलाई अत्यावश्यक वस्तुका रूपमा स्विकारेको भए पनि यसको उचित प्रयोग गर्ने तरिका, सुरक्षा र संवेदनशीलताप्रति सचेत नभएकाले जोखिम बढ्दै गएको एसओएस हर्मन माइनर माध्यमिक विद्यालयका प्रधानाध्यापक शशीकुमार उपाध्यायले बताए।
सबैभन्दा बढी उपभोक्ता युवापुस्ता भएकाले उनीहरूमा डिजिटल साक्षरतासँगै संयमताको खाँचो रहेको औँल्याए।
प्राविधिक ज्ञानलाई कक्षाकोठामा मात्र सीमित नराखी समाजको हितमा प्रयोग गर्ने उद्देश्यले आयोजित यस कार्यक्रमले समुदायमा सकारात्मक सन्देश प्रवाह गरेको उपस्थितरहरूले बताएका छन् ।
एसओएस हर्मन माइनर माविमा इटहरीमै एकमात्र कम्प्युटर इन्जिनियरिङ कार्यक्रम सञ्चालनमा रहेको छ। कक्षा ९–१२ कार्यक्रमअन्तर्गत कक्षा ९ मा हरेक वर्ष ४८ जनाको सिट क्षमतामा विद्यार्थी भर्ना हुने गरेको विद्यालयले जनाएको छ।
Discussion about this post