इटहरी : १६ औं संस्करणको इटहरी गोल्डकप फुटबल प्रतियोगितामा युवा समाज मोरङ सेमिफाइनलमा प्रवेश गरेको छ।
सोमवार राति भएको उद्घाटन खेलमा युवा समाज मोरङले जस्ट जोन फुटबल क्लब नाइजेरियालाई ३–२ गोल अन्तरले पराजित गर्दै अन्तिम चारमा स्थान सुरक्षित गरेको हो।
मोरङको जितमा श्रीजन गौतम, सुजन डंगोल र दोर्जे तामाङले एक–एक गोल गरे। खेलको चौथो मिनेटमै श्रीजनले गोल गर्दै मोरङलाई अग्रता दिलाएका थिए। विपक्षी डिफेन्डर तायो एक्किरिन्ससोयबाट रिबाउण्ड भएको बललाई उनले जाली चुमाएका हुन्।
३५ औं मिनेटमा डिबोला हामजामले गोल गर्दै खेल १–१ को बराबरीमा ल्याए। डेबिड ओलवोको फ्रिकिक मोरङका गोलकिपर प्रमञ्जय गच्छदारले नियन्त्रण गर्न नसक्दा आएको रिबाउण्ड बललाई हामजामले सदुपयोग गरेका थिए।
पहिलो हाफ १–१ को बराबरीमा सकिएको थियो।
दोस्रो हाफको ३८औं मिनेटमा सुजन डंगोलले उत्कृष्ट गोल गर्दै मोरङलाई पुनः अग्रता दिलाए। त्यसपछि ४२औं मिनेटमा दोर्जे तामाङले गोल थपेपछि खेल ३–१ को अवस्थामा पुगेको थियो।
खेलको अन्त्यतिर थपिएको पाँच मिनेटको अतिरिक्त समयमा एडिगन पिटरले एक गोल फर्काए पनि नाइजेरियन टोलीलाई हारबाट जोगाउन पर्याप्त भएन।
खेलको ‘प्लेयर अफ द म्याच’ दोर्जे तामाङ घोषित भए। उनले नगद १० हजार रुपैयाँ प्राप्त गरे।
मंगलबार हुने दोस्रो क्वाटरफाइनल खेलमा साविक विजेता मछिन्द्र फुटबल क्लब र झापा–११ बीच प्रतिस्पर्धा हुनेछ। राष्ट्रिय जागृति क्लबले आयोजना गरेको प्रतियोगिता वैशाख ७ गतेसम्म सञ्चालन हुनेछ।
राष्ट्रिय जागृति क्लब इटहरीको आयोजनामा भइरहेको प्रतियोगितामा नेपाल र विदेशका गरी ८ टोली सहभागी छन्।
जसमा मच्छिन्द्र फुटबल क्लब, प्लानिङ ब्वाइज क्लब, झापा–११, सातदोबाटो फुटबल क्लब, युवा समाज मोरङ, आयोजक राष्ट्रिय जागृति क्लब, यूकेएफसी भारत र जस्ट जोन फुटबल क्लब नाइजेरिया रहेका छन्।
प्रतियोगिताको विजेताले १० लाख रुपैयाँ प्राप्त गर्नेछ भने उपविजेता टिमले ५ लाख रुपैयाँमा चित्त बुझाउनेछ।
यस्तै, सर्वोत्कृष्ट खेलाडीलाई १ लाख रुपैयाँ, प्रत्येक खेलको ‘म्यान अफ द म्याच’लाई १० हजार रुपैयाँ प्रदान गरिनेछ।
त्कृष्ट गोलरक्षक, डिफेन्डर, मिडफिल्डर, स्ट्राइकर र प्रशिक्षकलाई जनही २० हजार रुपैयाँ तथा सर्वाधिक गोलकर्तालाई २५ हजार रुपैयाँ पुरस्कार प्रदान गरिने आयोजकका अध्यक्ष केशव कार्कीले जानकारी दिए ।
Discussion about this post