इटहरी : साविक विजेता मछिन्द्र फुटबल क्लबलाई पराजित गर्दै युवा समाज मोरङ १६ औं संस्करणको अन्तराष्टिय आमन्त्रण इटहरी गोल्डकपको फाइनलमा प्रवेश गरेको छ ।
शुक्रबार राति सम्पन्न पहिलो सेमिफाइनल खेलमा युवा समाज मोरङले मछिन्द्रलाई सडन डेथमा ५–४ गोल अन्तरले पराजित गर्दै फाइनल पुग्ने पहिलो टोली बनेको हो । निर्धारित समयमा दुवै टिमले ३–३ गोलको बराबरी खेलेपछि खेलको निर्णय पेनाल्टी सुटआउटबाट लिइएको हो ।
पेनाल्टीमा पनि दुवै टिमबाट ४–४ गोल भएपछि खेल सडन डेथमा गएको हो । सडन डेथमा मछिन्द्रका युवराज ढकालले गोल गर्न सकेनन् । त्यसपछि निर्णायक प्रहार गर्न आएका पदम भटराईले गोल गरेपछि युवा समाज उपाधी नजिक पुगेको हो ।
त्यसअघिको पेनाल्टीमा मछिन्द्रका रोहित चन्द, दिपेश गुरुङ, देवेन्द्र तामाङ र तुसार विश्वकर्माले गोल गर्दा सनिस श्रेष्ठको प्रहार पोलमा लागेर बाहिरिएको थियो ।
युवा समाजका रामचन्द्र वाजी, बिशाल तामाङ, शिशिर लेखी र सृजनराज गौतमले गोल गर्दा कप्तान सुजन चौधरीको प्रहार गोल पोष्टमा लागेर फर्किएको थियो ।
त्यसअघिको निर्धारित समयको १३ औ मिनेटमा मछिन्द्रका प्रदीप बुढाथोकीले गोल गरेर टिमलाई सुरुवाती अग्रता दिलाएका थिए । सौरब लिम्बूले प्रहार गरेको कर्णर बललाई उनले हेड मार्फत गोल गरेका थिए ।
१६ औं मिनेटमा प्रदीपले नै थप अर्को गोल गरेपछि मछिन्द्रले २–० को अग्रता लिएको थियो ।
गोलकिपर प्रमञ्जय गच्छदार अघि बढेको मौकामा उनले प्रहार गरेको बल गोलपोष्टको लाइनमै रहेका विपक्षी डिफेण्डरले क्लियर गर्न नसक्दा मछिन्द्रले अग्रता दोब्बर बनाएको थियो । खेलको २२ औं मिनेटमा युवा समाजका जन्मजय धामीले गोल फर्काएपछी खेल २–१ को अवस्थामा आयो ।
पदम भटराईले दिएको पासलाई कमजोर डिफेन्सलाइनको फाइदा उठाउदै धामीले बललाई पोष्टको दिसा दिएका थिए ।
पहिलो हाफको अन्तिम तीन मिनेटको अतिरिक्त समयमा युवा समाजका सुजन डंगोलले गोल गरेपछी खेल २–२ को बराबरीको अवस्थामा आयो । सृजनराज गौतमले दिएको लामो पासलाई डंगोलले आकर्षक हेड गोल गरे ।
पहिलो हाफ २–२ गोलको बराबरीमा सकिए पनि दोस्रो हाफको २४ औं मिनेटमा पदम भटराईले गोल गरेपछी मोरङको टोली ३–२ को अग्रतामा लिदै खेलमा पुनरनगमन गर्यो । तर अन्तिम चार मिनेट सम्हालिन नसक्दा युवा समाजले जीतका लागि पेनाल्टी सुटआउट हुदै सडेनडेथसम्म कुर्नुपर्यो ।
दोस्रो हाफको अन्तिम ४ मिनेटको अतिरिक्त समयमा देबेन्द्र तामाङले गोल फर्काएपछी खेल ३–३ को बराबरीमा आयो ।
त्यसपछि खेलको निर्णय पेनाल्टी सुटआउट हुदै सडेनडेथमा पुगेको हो । खेलको प्लेयरअफद म्याच पदम भटराई घोषित हुदै नगद १० हजार हात पार्न सफल भए ।
शनिबारको अन्तिम सेमिफाइनल खेलमा सातदोबाटो युथ क्लब ललितपुर र प्लानिङ ब्वाइज काडमाण्डौँबीच खेल हुनेछ ।
राष्ट्रिय जागृति क्लबले आयोजना गरेको खेलको विजेताले नगद १० लाख र उपविवजेताले ५ लाख रुपैयाँ पुरस्कार पाउनेछ । फाइनल खेल वैशाख ७ गते हुनेछ ।
Discussion about this post