इटहरी : सुनसरी जिल्लामा सुकुम्बासी बसोबासको सबैभन्दा ठूलो केन्द्र धरान उपमहानगरपालिका बनेको छ।
उपलब्ध तथ्यांक अनुसार धरानमा मात्रै १४ हजार ७ सय ९१ सुकुम्बासी घरपरिवार बसोबास गरिरहेका छन्। जुन जिल्लाकै सबैभन्दा ठूलो संख्या हो।
धरानपछि दोस्रो स्थानमा इटहरी उपमहानगरपालिका रहेको छ। जहाँ करिब १० हजार सुकुम्बासी घरपरिवार बस्दै आएका छन्।
इटहरीका बूढी खोला, टेंग्रा खोला, खेती खोला आसपास तथा सिँचाइ नहर क्षेत्र वरिपरि यी परिवारहरू दुई दशकदेखि बसोबास गर्दै आएका हुन्।
जिल्लाभर करिब ४२ हजार सुकुम्बासी घरपरिवार रहेको अनुमान गरिए पनि धरान र इटहरीमै यसको ठूलो हिस्सा केन्द्रित देखिन्छ। यसले सुकुम्बासी व्यवस्थापनको चुनौती पनि यी दुई स्थानीय तहमा बढी केन्द्रित रहेको देखाएको छ।
स्थानीय तहका अनुसार सुकुम्बासी व्यवस्थापन, लालपुर्जा वितरण र व्यवस्थित बसोबास अझै पनि प्रमुख चुनौतीको रूपमा रहेको छ।
सुनसरीका विभिन्न स्थानीय तहमा बसोबास गर्दै आएका करिब ४२ हजार सुकुम्वासी घरपरिवार यतिबेला नीतिगत अन्योलका कारण भविष्यबारे चिन्तित बनेका छन्।
खासगरी पछिल्लो साता संघीय सरकारले काठमाडौँ उपत्यकाका विभिन्न ठाउँमा सुकुम्बासी बस्ती खाली गराएपछि सुनसरीका सुकुम्बासीमा पनि ‘डोजर त्रास’ फैलिएको हो।
Discussion about this post