धरान : सुनसरीको धरान उपमहानगरपालिका–९ बगैचा लाइनस्थित रत्न होटलबाट ३६.९१ ग्राम ब्राउनसुगरसहित तीन जनालाई प्रहरीले पक्राउ गरेको छ।
शुक्रबार राति करिब १० बजे होटलमा लागूऔषध कारोबार भइरहेको भन्ने विशेष सूचनाको आधारमा कोशी प्रदेश प्रहरी कार्यालय विराटनगर, इलाका प्रहरी कार्यालय धरान तथा वडा प्रहरी कार्यालय धरानबाट खटिएको संयुक्त प्रहरी टोलीले होटलको कोठा नम्बर ७ मा छापा मारेको थियो।
प्रहरीले कोठाभित्रबाट ब्राउनसुगर ३६ ग्राम ९१० मिलिग्राम पदार्थ बरामद गरेको जनाएको छ।
पक्राउ पर्नेमा सिन्धुपाल्चोक मेलम्ची नगरपालिका–४ बाँसखर्क घर भई हाल काठमाडौं गोकर्णेश्वर नगरपालिका–६ बस्ने २० वर्षीय सन्देश तामाङ, काभ्रेपलाञ्चोक पाँचखाल नगरपालिका–३ ठाँटी घर भई हाल काठमाडौं कागेश्वरी मनोहरा नगरपालिका–६ बस्ने २२ वर्षीय समीर दियाली र झापा बिर्तामोड नगरपालिका–६ नयाँ बसपार्क बस्ने २८ वर्षीय क्षितिज भण्डारी रहेका छन्।
उनीहरूको साथबाट बागमती प्रदेश ०२-०२७ प ३२८१ र बागमती प्रदेश ०२-०४३ प ४८८२ नम्बरका दुई वटा मोटरसाइकल समेत नियन्त्रणमा लिइएको प्रहरीले जनाएको छ।
पक्राउ परेका तीनै जनामाथि इलाका प्रहरी कार्यालय धरानमा थप अनुसन्धान भइरहेको प्रहरीले जनाएको छ।
Discussion about this post