इटहरी : इटहरीस्थित जनता माध्यमिक विद्यालय व्यवस्थापन समिति अध्यक्ष चयन प्रक्रियालाई लिएर विवाद उत्कर्षमा पुगेको छ ।
अध्यक्ष चयन प्रक्रिया अवैधानिक र अलोकतान्त्रिक भएको आरोप लगाउँदै अभिभावकहरुले सोमबार इटहरी उपमहानगरपालिकाको गेटमा धर्ना दिएका छन् ।
उपमहानगरपालिकाको मूल गेट अगाडि प्लेकार्डसहित प्रदर्शनमा उत्रिएका अभिभावकहरुले विद्यालय व्यवस्थापन समिति गठन अभिभावक भेलाबाट हुनुपर्नेमा नगर शिक्षा समितिले बाहिरबाट व्यक्तिलाई थोपरेको आरोप लगाए ।
उनीहरूले हाल गठन गरिएको समिति खारेज गरी अभिभावकको प्रत्यक्ष सहभागिताबाट नयाँ समिति चयन गर्न माग गरेका छन् ।
केही दिनअघि इटहरी उपमहानगरपालिका अन्तर्गतको नगर शिक्षा समितिले दुई कार्यकाल अध्यक्ष भइसकेका काशीनाथ दंगाललाई पुनः विद्यालय व्यवस्थापन समिति अध्यक्ष चयन गरेको थियो ।
सोही निर्णयपछि विद्यालयभित्रको असन्तुष्टि सार्वजनिक रूपमा सडकसम्म पुगेको हो ।
सोही विषयमा नेकपा एमाले इटहरी नगर कमिटीले विद्यालय व्यवस्थापन समितिमा कुनै राजनीतिक भागबन्डा नलिने घोषणा गर्दै चयन प्रक्रियामै प्रश्न उठाएको छ ।
नगर अध्यक्ष रुपेश बस्नेतले जारी गरेको विज्ञप्तिमा शिक्षा क्षेत्रमा राजनीतिक हस्तक्षेप बढेको आरोप लगाएका छन् । उनले हालसम्म भएका प्रक्रिया र निर्णय सच्याएर अभिभावक भेलामार्फत नयाँ समिति गठन गर्न माग गरेका छन् ।
एमालेले एउटै व्यक्तिलाई पटक–पटक अध्यक्ष बनाउनु गलत अभ्यास भएको टिप्पणी गरेको छ ।
यो पनि – इटहरीको जनता माविमा प्रक्रिया मिचेर फेरि उही अनुहार, चौतर्फी आलोचना
Discussion about this post