इटहरी : मोरङको सुन्दरहरैँचा–१० स्थित सुकुना माध्यमिक विद्यालयमा छात्रामाथि अमर्यादित व्यवहार गरेको आरोपमा पक्राउ परेका चारै जनालाई जिल्ला अदालत मोरङले पाँच दिन हिरासतमा राखेर अनुसन्धान गर्न अनुमति दिएको छ।
जिल्ला प्रहरी कार्यालय मोरङका अनुसार विद्यालयका बस चालक प्रदीप भट्टराई, विज्ञान शिक्षक किशोरलाल गच्छदार, लेखापाल तथा शिक्षक अविरल मास्के र नृत्य प्रशिक्षक भीमप्रसाद नेपाललाई बालबालिकाविरुद्धको कसुरअन्तर्गत अनुसन्धानका लागि अदालतबाट पाँच दिनको म्याद थप गरिएको हो।
प्रहरीका अनुसार घटनासम्बन्धी उजुरी तथा सामाजिक सञ्जालमार्फत सार्वजनिक भएका गुनासोका आधारमा अनुसन्धान अघि बढाइएको थियो।
अनुसन्धानका क्रममा प्राप्त प्रमाण, पीडित तथा अन्य व्यक्तिको बयान र थप सूचनाका आधारमा चारै जनाको संलग्नता देखिएपछि नियन्त्रणमा लिइएको जनाएको छ।
पछिल्लोपटक पक्राउ परेका भीमप्रसाद नेपाल झापाको बुद्धशान्ति गाउँपालिका–७ निवासी हुन्।
उनी विद्यालयमा नृत्य प्रशिक्षकका रूपमा कार्यरत रहेको प्रहरीले जनाएको छ। उनी पक्राउ परेसँगै यस घटनामा पक्राउ पर्नेको संख्या चार पुगेको हो।
जिल्ला प्रहरी कार्यालय मोरङका प्रवक्ता डीएसपी मकेन्द्रकुमार मिश्रले घटनाका सबै पक्षबाट अनुसन्धान भइरहेको बताउँदै प्रमाणका आधारमा आवश्यक कानुनी प्रक्रिया अघि बढाइने जानकारी दिए।
यो पनि – मोरङको सुकुना माविका शिक्षकले विद्यार्थीलाई ‘गोप्य अंग देखाउ’ भनेपछि…
Discussion about this post