सात दिनपछि सुनसरी सामान्य लयमा, बजार खुले, यातायात नियमित

इटहरी : सुनसरीको देवानगञ्ज गाउँपालिका–३ कप्तानगञ्जमा भएको गोलीकाण्डपछि प्रभावित बनेको सुनसरीको जनजीवन सात दिनपछि विस्तारै सामान्य अवस्थामा फर्किन थालेको छ।

कर्फ्यू हटाएर निषेधाज्ञा लागू गरिएसँगै बजार खुलेका छन् भने सार्वजनिक यातायात सेवा पनि नियमित बन्दै गएको छ।

इनरुवा बजारका अधिकांश व्यापारिक प्रतिष्ठान, बैंक तथा वित्तीय संस्था आइतबारदेखि सञ्चालनमा आएका छन्। बजार खुलेसँगै किनमेल गर्ने उपभोक्ताको चहलपहल बढ्न थालेको व्यवसायीहरूले बताएका छन्।

केही दिनअघिसम्म सुनसान देखिएका बजार र चोकमा अहिले दैनिक गतिविधि पुनः चलायमान हुन थालेका छन्।

पूर्व–पश्चिम राजमार्ग हुँदै सञ्चालन हुने छोटो तथा लामो दूरीका सार्वजनिक सवारीसाधन पनि क्रमशः सञ्चालनमा आएका छन्। काठमाडौं, पोखरा, वीरगञ्ज, जनकपुरलगायतका गन्तव्यमा बस सेवा पुनः नियमित हुन थालेको यातायात व्यवसायीहरूले बताएका छन्।

साउन १० गते आइतबार राति कप्तानगञ्जमा भएको घटनामा दुई जनाको मृत्यु भएपछि अवस्था तनावग्रस्त बनेको थियो। जसकारण सुनसरीका विभिन्न क्षेत्रमा कर्फ्यू र निषेधाज्ञा लागू गरिएको थियो।

त्यसको प्रभाव सुनसरीसँगै मधेश प्रदेशतर्फ जाने सार्वजनिक यातायात, व्यापार र दैनिक जनजीवनमा परेको थियो।

सडकमा सवारीसाधनको चाप बढ्न थालेको छ भने बजार क्षेत्रका अधिकांश पसल सञ्चालनमा आएका छन्।

सुनसरी प्रहरीका सूचना अधिकारी डीएसपी चन्द्रबहादुर खड्काले सुरक्षा निकायको सक्रिय परिचालन, स्थानीय तहसँगको समन्वय र सुरक्षा अवस्था सुधार भएसँगै जिल्लाको अवस्था सामान्यतर्फ उन्मुख भएको बताए।

उनका अनुसार सर्वसाधारणले पनि दैनिक जीवन सहज बन्दै गएको अनुभूति गर्न थालेका छन्।