इटहरी : सुनसरीको बराहक्षेत्रमा प्रहरीले कार र मोटरसाइकलबाट ओसारपसार भइरहेको ४१८ किलो गाँजासहित चार जनालाई पक्राउ गरेको छ।
इलाका प्रहरी कार्यालय महेन्द्रनगरबाट शनिबार बिहान खटिएको प्रहरी टोलीले बराहक्षेत्र नगरपालिका–१ स्थित गुप्त बराह–चतरा भित्री सडकखण्डमा विशेष सूचनाका आधारमा चेकजाँच गर्ने क्रममा ठूलो परिमाणमा गाँजा बरामद गरेको हो।
प्रहरीका अनुसार बराहक्षेत्रबाट चतरातर्फ जाँदै गरेको प्रदेश १–०२–००२ च ४८५१ नम्बरको कार र को ११ प ५६०१ नम्बरको मोटरसाइकल रोकी जाँच गर्दा २२ वटा प्लास्टिकका पोकामा लुकाएर राखिएको ४१८ किलो गाँजा फेला परेको थियो।
पक्राउ पर्नेमा कार चालक धरान उपमहानगरपालिका–१३ का ३४ वर्षीय थमन राई, कारमा सवार ओखलढुंगाको मानेभञ्ज्याङ गाउँपालिका–५ की २२ वर्षीया जीवनी राई तथा मोटरसाइकल चालक मोरङको कटहरी गाउँपालिका–३ का २६ वर्षीय अमर कामत र पछाडि सवार सोही ठाउँका ३८ वर्षीय शंकर चौधरी छन्।
प्रहरीले गाँजा ओसारपसारमा दुवै सवारी साधन प्रयोग भएको जनाएको छ। पक्राउ परेका चारै जना, बरामद गाँजा र सवारी साधनलाई नियन्त्रणमा लिएर इलाका प्रहरी कार्यालय महेन्द्रनगरमा राखेर थप अनुसन्धान भइरहेको प्रहरीको भनाइ छ।
Discussion about this post