इटहरी : सुनसरीको देवानगञ्ज गाउँपालिका–३, कप्तानगञ्जमा भएको घटनामा घाइते भई मृत्यु भएका २२ वर्षीय रवीन्द्र मेहताको शव एक सातादेखि त्रिवि शिक्षण अस्पतालमै रोकिएको छ।
रवीन्द्रको साउन १९ गते उपचारका क्रममा मृत्यु भए पनि सरकार र परिवारबीच सहिद घोषणा गर्ने विषयमा सहमति जुट्न नसक्दा पोस्टमार्टमसमेत हुन सकेको छैन।
परिवारले पोस्टमार्टमअघि नै रवीन्द्रलाई सहिद घोषणा गर्नुपर्ने माग गर्दै आएको छ। शरीरमा गोली लागेको भन्दै परिवारले पोस्टमार्टमअघि नै गोलीको ब्यालेस्टिक परीक्षण गर्नुपर्ने मागसमेत राखेको छ।
तर गृह प्रशासनले सहिद घोषणा गर्न निश्चित प्रक्रिया पूरा गर्नुपर्ने भएकाले पहिले पोस्टमार्टम गर्नुपर्ने अडान लिएको छ।
गृहमन्त्री सुधन गुरुङका स्वकीय सचिव जेम्स कार्कीका अनुसार गृहमन्त्री सहिद घोषणा गर्ने विषयमा सकारात्मक भए पनि कानुनी तथा प्रक्रियागत पक्ष पूरा गर्नुपर्ने अवस्था छ।
रवीन्द्रको मृत्युपछि गृहमन्त्री गुरुङले साउन १९ गते शिक्षण अस्पतालमै पुगेर परिवारसँग छलफल गरेका थिए। त्यसपछि परिवारलाई गृह मन्त्रालयमा बोलाएर समेत वार्ता गरिएको थियो। तर सहिद घोषणा र घटनामा संलग्नलाई पक्राउ गर्नुपर्ने परिवारको मागमा सहमति नजुटेपछि शवको अन्त्येष्टिसमेत हुन सकेको छैन।
कप्तानगञ्जमा साउन १० गते भएको दुई पक्षबीचको घटनामा घाइते भएका रवीन्द्रको उपचारका क्रममा मृत्यु भएको थियो।
सोही घटनाक्रमसँग सम्बन्धित हिंसामा कप्तानगञ्जकै ओमप्रकाश मेहता र जयप्रकाश मेहतासहित सिराहाका गणेश यादवको समेत मृत्यु भएको छ।
Discussion about this post