इलाम : इलामको फाकफोकथुम गाउँपालिका–६ हाङ्मासुलीस्थित पोखरी कमरे भित्री कच्ची सडकखण्डमा अटो दुर्घटना हुँदा ६ जना घाइते भएका छन्।
आज साँझ करिब ५ बजे मङ्गलबारेबाट हाङ्मासुलीतर्फ जाँदै गरेको मधेश प्रदेश–०३–००३ ह ६९६७ नम्बरको अटो अनियन्त्रित भई सडकबाट करिब २ मिटर तल खसेर दुर्घटना भएको हो। दुर्घटनापछि अटोबाट पेट्रोल लिकेज भई आगलागीसमेत भएको जनाइएको छ।
दुर्घटनामा अटो चालक फाकफोकथुम गाउँपालिका–६ पोखरी बजारका करिब ३५ वर्षीय लोकबहादुर श्रेष्ठ, फाकफोकथुम–६ हाङ्मासुली माइती भएकी इलाम नगरपालिका–७ तिल्केनीकी करिब २७ वर्षीया कविता श्रेष्ठ र उनकी ८ वर्षीया छोरी खुसिका श्रेष्ठ गम्भीर घाइते भएका छन्।
त्यस्तै, देउमाई नगरपालिका–४ मङ्गलबारे घर भई फाकफोकथुम–६ हाङ्मासुली माइती भएकी २२ वर्षीया दुर्गादेवी श्रेष्ठ सामान्य, फाकफोकथुम–६ हाङ्मासुलीकी २७ वर्षीया मन्दिरा थापा मध्यम तथा झापाको कनकाई नगरपालिका–माईधार घर भई फाकफोकथुम–६ हाङ्मासुली माइती भएकी करिब ४० वर्षीया रमा कुमारी श्रेष्ठ सामान्य घाइते भएका छन्।
सामान्य दुर्घटनामा परेको अटोको अचानक इन्धन लिकेज भएपछि आगलागीका कारण यात्रु घाइते भएका हुन् । घाइते सबैलाई उपचारका लागि झापास्थित बी एन्ड सी अस्पतालतर्फ पठाइएको जनाइएको छ। घटनाबारे थप विवरण आउन बाँकी रहेको प्रहरीले जनाएको छ।
Discussion about this post