विराटनगर : कोशी प्रदेशका मोरङ, झापा र सुनसरी जिल्लामा एकैदिन भएका १५ वटा सवारी दुर्घटनामा १६ जना घाइते भएका छन्। घाइतेमध्ये दुई जनाको अवस्था गम्भीर रहेको प्रहरीले जनाएको छ।
प्रहरीका अनुसार मोरङमा भएका पाँच दुर्घटनामध्ये कटहरी गाउँपालिका–४ जुडी खोला पुलनजिक हुलाकी सडकमा जुट बोकेको ट्रक सडकबाट करिब १० मिटर तल खसे पनि मानवीय क्षति भएको छैन।
विराटनगर–६ मा म्याजिक भ्यानले मोटरसाइकललाई ठक्कर दिँदा १९ वर्षीय अदिक आलम घाइते भएका छन्। पथरीशनिश्चरे–१० मा मोटरसाइकल अनियन्त्रित भई घरमा ठोक्किँदा चालक चन्द्रबहादुर विक घाइते भएका छन्।
कानेपोखरी–७ मा स्कारपियोले तीनवटा राँगालाई ठक्कर दिँदा एउटा राँगाको मृत्यु भएको छ। सुनवर्षी–७ मा मोटरसाइकलले पैदलयात्रीलाई ठक्कर दिँदा तीन जना घाइते भएका छन्।
झापामा पनि विभिन्न स्थानमा भएका दुर्घटनामा आठ जना घाइते भएका छन्। दमक–१ मा मोटरसाइकल अनियन्त्रित हुँदा दुई जना, दमक–१ मै सिटी सफारी र मोटरसाइकल ठोक्किँदा दुई जना, बिर्तामोड–२ मा सिटी सफारी दुर्घटनामा एक जना र गौरादह–४ मा मोटरसाइकलको ठक्करबाट एक जना घाइते भएका छन्।
कमल गाउँपालिका–४ मा मोटरसाइकलले भैंसीलाई ठक्कर दिँदा चालक घाइते भएका छन्। मेचीनगर–६ मा स्कुटर दुर्घटना हुँदा चालक बसन्त खड्का गम्भीर घाइते भएका छन्।
सुनसरीको भोक्राहा नरसिंह गाउँपालिका–८ मा मोटरसाइकलको ठक्करबाट दुई वर्षीय बालिका अन्या खातुन घाइते भएकी छन्। उनलाई प्रारम्भिक उपचारपछि थप उपचारका लागि विराटनगरस्थित न्युरो अस्पताल पठाइएको छ।
इटहरी–४ पुलचोकमा मोटरसाइकल अनियन्त्रित भई दुर्घटना हुँदा चालक रोशन ठाकुर गम्भीर घाइते भएका छन्।
उनलाई बेदान्त अस्पताल इटहरीमा प्रारम्भिक उपचारपछि विराट मेडिकल कलेज तथा शिक्षण अस्पताल विराटनगर लगिएको प्रहरीले जनाएको छ। बर्जु गाउँपालिका–६ मा मोटरसाइकल दुर्घटना हुँदा चालक विष्णु चौधरी सामान्य घाइते भएका छन्।
प्रहरीका अनुसार दुर्घटनाका कारणमा तीव्र गति, सडकमा ध्यान नदिनु, चिप्लो सडक, सवारी साधनको अनियन्त्रित अवस्था तथा सवारी चालकको लापरबाहीलगायत रहेका छन्।
केही घटनामा चालकको मादक पदार्थ सेवन तथा सवारी चालक अनुमतिपत्रसम्बन्धी विवरण खुलेको छैन। दुर्घटनामा संलग्न अधिकांश सवारी साधन प्रहरीले नियन्त्रणमा लिएको जनाएको छ।
Discussion about this post