विराटनगर : विराटनगरमा प्रहरीको चेकिङ छल्दै भाग्न खोजेको स्कोर्पियोले अर्को कारलाई ठक्कर दिएपछि ठूलो परिमाणमा गाँजा बरामद भएको छ ।
कोशी राजमार्गअन्तर्गत विराटनगर महानगरपालिका–३ आयल निगम नजिक शनिबार राति भएको घटनामा प्रहरीले तीन सय ९८ किलो गाँजासहित स्कोर्पियो नियन्त्रणमा लिएको हो ।
इटहरीबाट विराटनगरतर्फ जाँदै गरेको को १ च ७३९९ नम्बरको स्कोर्पियोलाई शनिबार राति करिब १० बजे प्रहरीले रोक्न खोजेको थियो । तर, चालकले गाडी तीव्र गतिमा अगाडि बढाएपछि प्रहरीले पछ्याएको थियो ।
भाग्ने क्रममा स्कोर्पियोले अगाडि जाँदै गरेको बागमती प्रदेश ०१–०३० च ४८२२ नम्बरको कारलाई पछाडिबाट ठक्कर दिएको थियो । त्यसपछि प्रहरीले स्कोर्पियो नियन्त्रणमा लिएर खानतलासी गर्दा गाँजा बरामद गरेको हो ।
मोरङ प्रहरी प्रमुख एसपी कवित कटवालका अनुसार स्कोर्पियोभित्र १३ वटा पोकामा प्याक गरी राखिएको तीन सय ९८ किलो गाँजा फेला परेको छ ।
दुर्घटनापछि स्कोर्पियो चालक फरार भएका छन् । प्रहरीले उनको पहिचान र खोजी गरिरहेको जनाएको छ । ठक्करबाट कारको पछाडिको भागमा क्षति पुगेको छ । कार चालक विराटनगर–३ का ४६ वर्षीय धिरज सिंह भने सकुशल रहेका छन् ।
प्रहरीले गाँजासहित स्कोर्पियो र ठक्कर भएको कार दुवै नियन्त्रणमा लिएर जिल्ला प्रहरी कार्यालय मोरङमा राखेको छ ।
बरामद गाँजा कहाँबाट ल्याइएको थियो र कहाँ पुर्याउन लागिएको थियो भन्ने खुलेको छैन । गाँजाको स्रोत, ओसारपसारमा संलग्न व्यक्ति तथा घटनाबारे प्रहरीले थप अनुसन्धान गरिरहेको जनाएको छ ।
Discussion about this post