सुनसरी : पूर्व अर्थमन्त्री तथा नेपाली कांग्रेसका केन्द्रीय सदस्य ज्ञानेन्द्र कार्कीको पहलमा श्रीलङ्का टापुमा बिजुली पुगेको छ ।
प्रतिनिधिसभामा सुनसरी क्षेत्र नं. ४ बाट बिजयी भएका उनले निर्वाचनताका समयमा आँफूले यो क्षेत्रमा भएका आधारभूत आवश्यकतालाई मध्यनजर गर्दै विकास निर्माण गर्ने बताएका थिए । सोही अनुसार कार्कीले पहल गरी यो क्षेत्रमा बिजुली पुर्याएका हुन् ।
साँझ परेपछि टुकी र सौर्य उर्जाको मधूरो उज्यालोमा बस्ने श्रीलङ्का टापुका बासिन्दाहरूले यस बर्षदेखि भन्ने बिधुतीय उर्जा प्रयोग गर्न थालेकाले हर्षित भएका छन् ।
तीन साता अघिसम्म छिमेकी गाउँमा बलेको बिजुली बत्तीको उज्यालोलाई टाढाबाट हेर्दै आफ्नो घरमा टुकी बालेर चित्त बुझाउँथे पाडण्व चन्द्रवंशी र उनका छरछिमेकीहरू । अहिले आफ्नो गाउमा नै बिजुली बल्न थालेपछि आँफूहरु खुशी भएको उनको भनाई छ ।
वराहक्षेत्रमा विद्युतीकरण सुरु भएको चारदशक बितिसकेको छ । तर, श्रीलङ्का टापुका करीब ५ हजार बासिन्दाले भने टुकी र सौर्य उर्जाकै भरमा साँझको स्वागत गर्दै आएका थिए । अरूका लागि सामान्य भएपनि श्रीलङ्का टापुका बासिन्दाका लागि आफ्नो गाउँघरमा बिजुली बल्नु ठूलै उपलब्धि भएको उनले बताए ।
सुगम जिल्लाको दुर्गमस्थल मानिएको श्रीलङ्का टापुमा बिजुली बल्दा गाउँमा खुशीयाली छाएको स्थानीय रामसेवक मेहताले बताए । उनले भने, ‘टुकी र सौर्य उर्जाको ठाउँमा बिजुली बत्ती आयो । बिजुलीलाई सदुपयोग गरेर गाउँका किसानहरूले आयमूलक क्षेत्रमा लागेर जीविका चलाउन सक्ने भएका छन ।’
श्रीलङ्का टापुमा नेपाल सरकारको ग्रामीण विद्युतीकरण कार्यक्रम अन्तर्गत करीब अढाई करोड रुपैँयाको लगानीमा विद्युत विस्तार भएको नेपाल विद्युत प्राधिकरण इटहरी वितरण केन्द्रका प्रमुख मिथिलेसकुमार गइवारले जानकारी दिए ।
उनले भने, ‘अनगोइङ प्रोजेक्ट हो, थप टेण्डर भएको छ । ५ वटा ट्रान्सफर्मर जडान गरेका छौं । छुटफुट लाइन भने विस्तार गर्नेछौं । कोरोना सङ्क्रमणका बेला औपचारिक कार्यक्रम गरिएन, हाललाई विद्युत छाडेका छौं ।’
बर्सेनी जङ्गली हात्ती र अन्य जनावरले आतङ्क मच्चाउँदै वार्षिक ५० लाख रुपैयाँभन्दा बढीको धनमाल, बालीनाली क्षति पुर्याउने गरेको टप्पुमा बिजुली पुगेपछि जंगली जनावरले समेत दुःख नदिने स्थानीयको विश्वास रहेको वराहक्षेत्र–९ का वडा सदस्य समेत रहेका शम्भु चन्द्रवंशीले बताए ।
Discussion about this post