धरानमा चौकको नाममा विवाद हुँदा दुई पक्षबीच झडप, जनप्रतिनिधि सहित तीनजना घाईते

धरान १४ स्थित विजयपुरमा चौकको नाममा विवादको क्रममा दुई पक्षबीच झडप हुँदा १४ नम्बर वडाका दलित महिला सदस्य सहित तीनजना जना घाइते भएका छन् ।

धरान १४ को बमधारा मार्गमा नामकरण गरिएको शिवजी चौकको विषयमा विवाद भएको थियो । शिवजी चौक भन्दा युवाहरूलाई लक्षित गरेर गजाडी भन्न खोजेको आरोप लगाउँदै केही युवाहरूले विरोध गर्दै आएका थिए ।

झडपको क्रममा धरान १४ का दलित महिला सदस्य मनिषा विक, पूर्व प्रहरी हवल्दार झलक तामाङ र सुरज विक घाइते भएका छन् । घाइतेहरूलाई बीपी कोइराला स्वास्थ्य विज्ञान प्रतिष्ठानमा उपचारका लागि लगिएको छ ।

झडपमा संलग्न ५ जनालाई प्रहरीले पक्राउ गरेको छ । ईलाका प्रहरी कार्यालय धरानका अनुसार बाबुराम अधिकारी, अर्जुन तामाङ, पदम तामाङ, गणेश कार्की र मनोज तामाङलाई प्रहरीले पक्राउ गरी घटनाबारे अनुसन्धान अगाडि बढाएको छ ।