इटहरी : सुनसरीबाट एक सय ६५ किलो गाँजासहित एकजनालाई प्रहरीले पक्राउ गरेको छ । जिल्ला प्रहरी कार्यालय सुनसरी र सीमा प्रहरी चौकी भण्टाबारीबाट खटिएको प्रहरी टोलीले एक सय ६५ किलो गाँजासहित एकजनालाई पक्राउ गरेको हो ।
सुनसरी प्रहरीका सूचना अधिकारी प्रहरी नायब उपरीक्षक (डीएसपी) नरेन्द्र कार्कीका अनुसार पक्राउ पर्नेमा सुनसरीको कोशी गाँउपालिका ८ बस्ने ४० वर्षीय गणेश यादव रहेका छन् ।
डीएसपी कार्कीका अनुसार १६ गते राति साढे २ बजेको समयमा कोशी गाँउपालिकास्थित राजमार्ग दक्षिणपट्टी रहेको पानीट्यांकी नजिकै प्लाष्टिकले बेरेर शंकास्पद रुपमा राखिएको ६ थान बोरा फेला पारेको थियो । गाँजा फेला पारेपछि अनुसन्धान गर्ने क्रममा यादवलाई पक्राउ गरिएको प्रहरीको भनाई छ ।
पक्राउ परेका यादवमाथि लागूऔषध नियन्त्रण ऐन २०३३ बमोजिम जिल्ला अदालत सुनसरीबाट म्याद थप गरी अनुसन्धान भइरहेको प्रहरीले जनाएको छ ।
जिल्लामा लकडाउनको मौका छोपेर लागूऔषध कारोबार गर्ने सक्रिय भएकाले निगरानी बढाइएको डीएसपी कार्कीले बताए ।
Discussion about this post