फिदिम | पाँचथरको मिक्लाजुङ गाउँपालिकामा एक पुरुषको हत्या गरी आत्महत्याको रूप दिन खोज्ने दुई जनालाई प्रहरीले पक्राउ गरेको छ।
जिल्ला प्रहरी कार्यालय पाँचथरका अनुसार मिक्लाजुङ गाउँपालिका वडा नं. ३ आहाले सिरानस्थित ४८ वर्षीय इन्द्रकुमार दमाईको हत्या आरोपमा दुई जनालाई पक्राउ गरिएको हो।
भदौ २० गते ईन्द्र दमाई मृत अवस्थामा फेला परेको खबर पाएलगत्तै प्रहरी निरीक्षकको टोली प्रारम्भिक अनुसन्धानका लागि घटनास्थल खटिएको थियो।
मृतकको घाँटीमा कपडाको सलको पासो, शरीरका अन्य भाग र निधारमा धारिलो वस्तुले प्रहार गरेको जस्तो चोटपटक देखिएपछि प्रहरीले घटनालाई शङ्कास्पद मान्दै अनुसन्धान अघि बढाएको थियो।
अनुसन्धानका क्रममा दमाईलाई उनकै घरमा बञ्चरो प्रहार गरी हत्या गरिएको खुलेको छ। हत्यापछि शवलाई घर नजिकैको आल्चाको रूखमा झुण्ड्याएर आत्महत्या जस्तै देखाउने कोसिस गराएको पनि प्रारम्भिक बयानमा खुलेको छ। झुण्याउँदा पनि घटना लुक्न नसक्ने देखेपछि उक्त स्थानबाट ५०० मिटर तल भिर पाखामा फ्याँकिएको प्रारम्भिक अनुसन्धानबाट खुल्न आएको प्रहरीले जनाएको छ।
घटनामा संलग्न दुईजना बालक रहेका छन्।कर्तव्य गरी मारेको अभियोगमा प्रहरीले परिवर्तित नाम ०२-०८३/०८४-०४ र कानुनको विवादमा परेका बालक परिवर्तित नाम ०२-०८३/०८४-४(अ) लाई पक्राउ गरेको छ।
घटनामा प्रयोग गरिएको बञ्चरो तथा दाउ समेत बरामद गरी अभियुक्तहरूलाई जिल्ला प्रहरी कार्यालय ल्याइएको छ। पक्राउ परेका दुवै जनामाथि जिल्ला अदालत फिदिमबाट ५ दिनको म्याद थप गरी थप अनुसन्धान भइरहेको जिल्ला प्रहरी कार्यालय पाँचथरका कार्यालय प्रमुख प्रहरी नायव उपरीक्षक अनिस कुमार कर्णले जानकारी दिएका छन् ।
Discussion about this post