इटहरी : नेपाल आयुर्वेद औषधी व्यवसायी संघ प्रदेश १ ले विभिन्न जिल्लाका कोरोना संक्रमितहरुलाई स्वास्थ्य सामाग्री वितरण गरेको छ ।
आयुर्वेद औषधी व्यवसायी संघ प्रदेश १ का अध्यक्ष जगतबहादुर भट्टराईका अनुसार आयुर्वेद व्यवसायीहरु जनताको स्वास्थको रक्षामा समर्पित छ भन्ने उदेश्यका साथ स्वास्थ्य सामाग्री वितरण गरिएको हो । कोरोना महामारी जताततै फैलिएकाले पहाडी जिल्लामा समेत आयुर्वेदिक औषधी वितरण गरिएको उनले बताए ।
यसअघि आयुर्वेद औषधी व्यवसायी संंघले सामाजिक संस्थाहरु, सुरक्षाकर्मीहरु, स्वास्थकर्मीहरुलाई रोगप्रतिरोधात्मक आयुर्बेदिक औषधी सेनिटाइजर, मास्क, चेवनप्रास, ग्लोब जस्ता सामग्री समेत प्रदान गरिसकेको भट्टराईले बताए ।
‘यो अभियान सञ्चालन गरेको १५ दिन भयो,’ उनले भने, ‘पाँच लाख मूल्य बराबरको औषधी संकलन गरेर वितरण गरिरहेका छौँ ।’
औषधी र स्वास्थ्य सामाग्री संकलन गरी १ नं. प्रदेशमा रहेका कोरोना संक्रमित, स्वास्थ्यकर्मी, सुरक्षाकर्मीलाई वितरण गरिएको र गरिने क्रम अझै रहेको उनले बताए ।
प्रदेशभरी रहेका आयुर्वेदिक पसलबाट औषधी सामाग्री संकलन गरी संक्रमितको घरैमा पुर्याइएको उनले बताए । प्रदेशभरी उक्त अभियान सञ्चालन गर्दा सेवा प्रभावकारी बनेको उनको भनाइ छ । संक्रमितको अवस्था हेरेर विभिन्न मात्रामा औषधी वितरण गरिएको नेपाल आयुर्वेद औषधी व्यवसायी संघ प्रदेश १ का सचिव जीपी तिवारीले बताए ।
प्रदेश १ मा रहेका विभिन्न आइसोलेसन सेन्टरमा रहेका कोरोना संक्रमितहरुका लागि, सामाजिक संस्थाहरु सुधार केन्द्र, बालआश्रम, बृद्धाआश्रम तथा विकट ठाउँका वडाहरुमा रहेका होम आइसोलेसनमा रहेका संक्रमितहरुलाई औषधी वितरण गरिएको उनले बताए ।
प्रदेश १ का सुनसरी, मोरङ, झापा, उदयपुर, धनकुटा, भोजपुर लगायतका पहाडी जिल्लामा समेत आयुर्वेदिक औषधी निःशुल्क रुपमा वितरण गरिएको थियो ।
Discussion about this post