इटहरी : सुनसरीमा भएका छुट्टाछुट्टै सवारी दुर्घटनामा परी दुई जनाको मृत्यु भएको छ । दुवै दुर्घटना बिहीबार (कात्तिक ५ गते) भएका हुन् ।
जिल्ला प्रहरी कार्यालय सुनसरीका अनुसार धरान उपमहानगरपालिका–८ स्थित शनि मन्दिर नजिक कोशी राजमार्गमा तीव्र गतिमा रहेको मोटरसाइकल बिजुलीको पोलमा ठोक्किँदा चालकको मृत्यु भएको छ ।
को ३८ प ५९८९ नम्बरको मोटरसाइकल सडक किनारमा रहेको बिजुलीको पोलमा ठोक्किएर दुर्घटना हुँदा धरान उपमहानगरपालिका–५, देउराली निवासी २५ वर्षीय सम्राट तामाङको मृत्यु भएको हो । दुर्घटना दिउँसो करिब २ः४० बजेतिर भएको जनाइएको छ ।
त्यस्तै, सुनसरीको भोक्राहा नरसिंह गाउँपालिका–२ स्थित भित्री सडक खण्डमा ट्याक्सी र मोटरसाइकल एकआपसमा ठोक्किँदा अर्का एक जनाको मृत्यु भएको छ ।
दिउँसो करिब २ बजेतिर प्रदेश १–०१–००१ ज ३८६८ नम्बरको ट्याक्सी र प्रदेश १–०२–०४२ प ६३१४ नम्बरको मोटरसाइकल ठोक्किँदा मोटरसाइकलमा सवार भोक्राहा नरसिंह गाउँपालिका–१ निवासी करिब ६२ वर्षीय जनकलाल मेहताको मृत्यु भएको हो ।
सवारी दुर्घटना न्यूनीकरणका लागि तीव्र गति नियन्त्रण, ट्राफिक नियमको पालना र सडक सुरक्षामा ध्यान दिनु आवश्यक रहेको प्रहरीले जनाएको छ । दुवै घटनाबारे थप अनुसन्धान भइरहेको प्रहरीले जनाएको छ ।
Discussion about this post