इटहरी : सुनसरी र झापामा भएको अलगअलग दुर्घटनामा परेर दुई जनाको मृत्यु भएको छ ।
पूर्व–पश्चिम लोकमार्गअन्तर्गत सुनसरीको कोसी गाउँपालिका ६ भण्टाबारीमा ट्रकको ठक्करबाट साइकलमा सवार एक जनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार पूर्वतर्फ आउँदै गरेको प्रदेश–२–०३–००१ ख २५०५ नम्बरको ट्रकले सोही दिशातर्फ जाँदै गरेको साइकललाई ठक्कर दिँदा दुर्घटना भएको हो ।
प्रहरीका अनुसार दुर्घटनामा परेर भण्टाबारीका अन्दाजी ६०–६५ वर्षीय भरत सहनीको मृत्यु भएको छ । दुर्घटनामा गम्भीर घाइते भएका उनको उपचारका क्रममा इनरुवा अस्पतालमा साँझ ५ः२० बजेतिर मृत्यु भएको प्रहरीले जनाएको छ ।
प्रहरीले ट्रक र चालक सर्लाही घर भएका ५४ वर्षीय लासा दोर्जे जिम्वालाई नियन्त्रणमा लिएर घटनाको अनुसन्धान थालेको छ । घटनाको विरोधमा उत्रिएका स्थानीयले केहीबेर पूर्व–पश्चिम लोकमार्गमा अवरोध गरेका समेत गरे ।
यस्तै, झापाको मेचीनगर नगरपालिका ७ मा मोटरसाइकलको ठक्करबाट एक किशोरको मृत्यु भएको छ । पश्चिमबाट पूर्वतर्फ जाँदै गरेको मे १० प २२३२ नम्बरको मोटरसाइकलले युनिक पेट्रोल पम्पनजिक ठक्कर दिँदा १६ वर्षीय श्याम मगरको मृत्यु भएको हो ।
प्रहरीका अनुसार सडक पार गर्दैगर्दा मोटरसाइकलले मङ्गलबार राति ८ बजेतिर मगरलाई ठक्कर दिएको थियो । दुर्घटनामा परेर गम्भीर घाइते भएका उनको उपचारका क्रममा बिर्तामोडस्थित बि एन्ड सी अस्पतालमा राति ८ः४५ बजेतिर मृत्यु भएको प्रहरीले जनाएको छ ।
दुर्घटनामा सडक पार गर्दै गरेका खोटाङ घर भएका १७ वर्षीय बलबहादुर मगरको सोही अस्पतालमा उपचार जारी छ ।
प्रहरीका अनुसार दुर्घटनामा मोटरसाइकल चालक मेचीनगर १० का २२ वर्षीय अविजित सिटौला पनि सामान्य घाइते भएका छन् । उनको स्थानीय क्लिनिकमा उपचार भइरहेको छ ।
प्रहरीले दुवै घटनाको अनुसन्धान सुरु गरेको जनाएको छ ।
Discussion about this post