विराटनगर : विराटनगर महानगरपालिका ९ मा रहेको ग्रीनक्रस अस्पतालमा अविवाहित युवतीले जन्माएको बच्चा शिशु बिक्री गरिएको घटनामा संलग्न चिकित्सकसहित ६ जनाविरुद्ध सोमबार मुद्दा दर्ता गरिएको छ ।
अभियुक्तविरुद्ध जिल्ला अदालत मोरङमा अपहरण तथा व्यक्ति बेपत्ता पार्ने सम्बन्धी कसूरमा मुद्दा दायर भएको हो ।
घटनाको अनुसन्धान सकेर प्रहरीले मिसिल अनुसन्धान प्रतिवेदन बुझाएपछि सरकारी वकिल कार्यालय मोरङले अभियोगपत्र तयार पार्दै ६ जनालाई अभियुक्त बनाएर मुद्दा दर्ता गरेको छ । प्रहरीले गत शुक्रबार वकिल कार्यालयमा मिसिल बुझाएको थियो ।
मुद्दामा विराटनगर महानगरपालिका २ तीनपैनी घर भएका प्रसूति तथा स्त्रीरोग विशेषज्ञ ६८ वर्षीय डा. तपेश्वरलाल कर्ण, सिरहा घर भई विराटनगर ११ जनपथ टोल बस्ने ४० वर्षीया नीरु भनिने निर्मला यादव, भोजपुरको हतुवागढी गाउँपालिका ४ का २७ वर्षीय गोविन्द राई, मोरङको कटहरी गाउँपालिका २ आदर्श टोलकी ३३ वर्षीया सुधा भनिने सुत्री राजवंशी, ३० वर्षीय सूर्यनारायण राजवंशी र ४७ वर्षीया दिलमनीदेवी राजवंशीलाई प्रतिवादी बनाइएको छ ।
जिल्ला अदालत मोरङका सूचना अधिकारी ओमराज सुवेदीका अनुसार इजलासमा प्रतिवादीहरुको बयान मंगलबारबाट सुरु हुने छ ।
उनीहरूको बयान सकिएपछि वादी नेपाल सरकार र प्रतिवादीतर्फका कानुन व्यवसायीबीच थुनछेक बहस हुने छ । बहस सकिएपछि प्रतिवादीहरूलाई साधारण तारेखमा वा धरौटीमा छाड्ने कि पुर्पक्षका लागि कारागार चलान गर्ने भन्ने आदेश इजलासबाट आउने सुवेदीले बताए ।
अस्पतालबाटै बिक्री गरिएको नवजात शिशुलाई प्रहरीले मोरङको कटहरी गाउँपालिका २ बाट गत भदौ ५ गते जीवितै उद्धार गरेको थियो ।
अविवाहित युवतीले गत असार १४ गते जन्माएको शिशुलाई जन्मनसाथ अस्पतालबाटै गायब पारिएको थियो । प्रहरीको अनुसन्धानबाट डा. तपेश्वरले बच्चा दिलमनीदेवीको परिवारलाई ५ लाख रुपैयाँमा बिक्री गरेको खुलेको छ ।
Discussion about this post