तरहरा । १३ औँ दक्षिण एशियाली खेलकुद प्रतियोगिता (साग) अन्र्तगत भएको तेक्वान्दो खेलमा स्वर्ण पदक बिजेता शुशीला राई र साफ च्याम्पियनसीप अन्र्तगत भएको फुटबल खेलमा निर्णायक गोल गर्दै नेपाललाई बिजेता दिलाउन सफल भएका असीम राईलाई इटहरी २० तरहरामा सम्मान गरिएको छ ।
इटहरी उपमहानगरपालिका वडा नं. २० ले उनीहरुलाई शुक्रबार तरहरामा एक कार्यक्रमका बीच सम्मान गरेको हो । इटहरी २० तरहरा निवासी रहेकी शुशीलाले सागमा नेपाललाई स्वर्ण पदक दिलाएकी थिईन् । उनलाई नगद २५ हजार सहित सम्मान पत्रले कार्यक्रमका प्रमुख अतिथि सुनसरी क्षेत्र नं. २ बाट प्रतिनिधिसभा सदस्यमा निर्वाचित सांसद सिताराम मेहेताले सम्मान गरेका थिए । त्यस्तै, साफ च्याम्पियनसीप अन्र्तगत भएको खेलमा अन्तिम समयमा निर्णायक गोल गर्दै नेपाललाई जिताउन सफल भएका असीमलाई नगद १० हजार सहित सम्मान पत्रले सम्मान गरिएको थियो ।
तरहरा निवासी रहेका राईद्धयको फुटबल खेलमा अतुलनीय योगदान रहेको भन्दै उनलाई सम्मान गरिएको थियो । त्यस्तै, सोही कार्यक्रमको अवसर पारेर स्वर्ण पदक बिजेता शुशीला राईकी गुरु कुमार गुरुङलाई समेत सम्मान पत्रले सम्मान गरिएको थियो ।
शुशीला र असीमले खेल क्षेत्रमा नेपाललाई विश्वसामु चिनाउँन अथक मेहनत गरेको भन्दै सम्मान गरिएको वडाध्यक्ष मणिराम श्रेष्ठले बताए । उनले भने, ‘तरहराकी हाम्री चेलीले देशलाई नै विश्वमा चिनाउँन सफल भएको बधाईसहित उनको सम्मानका निम्ति यो सानो प्रयास गरेका हौँ ।’ शुशीलाले तेक्वान्दो खेलमार्फत र असीमले साफ च्याम्पियनसीप अन्र्तगत फुटबल खेलमा देशको शान राखेको भन्दै वडाध्यक्ष श्रेष्ठले प्रसंसा गरे ।
उनले आगामी दिनमा खेलाडीहरुको प्रोत्साहनका निम्ति कार्यक्रमको आयोजना गर्ने र सम्मान गर्ने समेत बताए । कार्यक्रमका प्रमुख अतिथि प्रतिनिधि सभा सदस्य सिताराम मेहेताले खेलाडी देशका गहना रहेको र वडाले उनीहरुको सम्मानमा कार्यक्रम आयोजना गर्नु सराहनीय रहेको तर्क गरे । ‘खेलाडीहरुकै कारण आज विश्वमा नेपाल चिनिएको छ,’ उनले भने, ‘खेलाडीहरुको सम्मानका निम्ति सबैले हातेमालो गर्ने समय आएको छ ।’
कार्यक्रम संयोजन गर्ने स्थानीय कलाकार नवीन गुरुङले भने खेलाडीलाई राष्ट्रले चिन्न नसकेको र उनीहरुको सम्मानका निम्ति सरकार गम्भीर नभएको तर्क गरे । उनले भने, ‘खेलाडीकै कारण आज नेपालले गर्व गर्न पाएको छ, तर खेलाडीको पीडा सरकारले बुझ्न सकेन ।’ खेलाडीको प्रोत्साहनका निम्ति वडाले सम्मान कार्यक्रम आयोजना गर्नु अनुकरणीय रहेको उनको भनाई थियो ।
Discussion about this post