इटहरी : नयाँ पुस्तामा दिनानुदिन सिर्जनशीलता खस्किँदो छ । साहित्य र सिर्जनाप्रति र पठनप्रतिको आकर्षण गिर्दो छ ।
भाषा र साहित्य जति बढी प्रयोग गरियो त्यति धेरै यो समृद्ध र परिष्कृत हुँदै जान्छ । यही तथ्यलाई मनन् गर्दै मिक्लाजुङ, मोरङमा मावि तहमा अध्ययनरत ४० बढी विद्यार्थीहरूको सहभागितामा दुई दिवसीय सिर्जना अभिमुखीकरण कार्यक्रम सम्पन्न भएको छ ।
हरेक वर्ष भाद्र १५ गते मनाइने पुस्तकालय दिवसको सन्दर्भ पारेर आयोजना गरिएको उक्त कार्यक्रमको पहिलो दिन इटहरीकी स्रष्टा कवयित्री टीका आत्रेयले लयबद्ध छन्द कविता र झापाका स्रष्टा विवश बलिभद्र कोइरालाले गीत, गजल सम्बन्धमा सहजीकरण गरेका थिए ।
दोस्रो दिन गद्य कविता र आख्यान लेखन सम्बन्धी सहजीकरण झापाका स्रष्टा क्रमशः धनकुटे कान्छा र घनश्याम पथिकले गरेका थिए ।
दुई दिनको कार्यक्रम सहजीकरणका दौरान विद्यार्थीहरूले कार्यक्रमस्थलमै सुन्दर रचनाहरू सिर्जना गरि प्रस्तुत समेत गरेका थिए । विद्यार्थीहरूको सक्रियता र सिर्जना देखेर र सुनेर सहजकर्ता पनि दंग परेको र कार्यक्रमको उद्देश्य केही हदसम्म पूरा भएको स्रष्टा धनकुटे कान्छाले बताए ।
आयोजक दुवै संस्थाका तर्फबाट कम्तीमा द्वैमासिक वा त्रैमासिक रूपमा यस्तै प्रकृतिका कार्यक्रमलाई निरन्तरता दिने र विद्यार्थीहरूका सिर्जना प्रस्तुत गर्ने अवसर दिने साथै प्रतिस्पर्धात्मक कार्यक्रम आयोजना गर्ने कवि एवम् मिक्लाजुङ साहित्य समाजका अधयक्ष गगन योक्पाङ्देनले प्रतिवद्धता व्यक्त गरे ।
सहभागी विद्यार्थीमध्ये रिलायन्स अंग्रेजी माविका छात्र निरिश साशंकर र सरस्वती अंग्रेजी माविकी छात्रा वर्षा निरौलाले समग्र कार्यक्रममा आफूले सिकेका कुरा, अनुभव र अनुभूति सम्बन्धमा मन्तव्य प्रस्तुत गरे ।
साथै, सहभागी शिक्षकमध्ये देवकोटा माविका शिक्षक लोकराज रोसेराले देउडा भाका समेत सुनाउँदै कार्यक्रम फलदायी रहेको र विद्यार्थीसँगै आफूले पनि धेरै कुरा सिकेको कुरा अभिव्यक्त गर्दै यस्ता कार्यक्रमलाई निरन्तरता दिन आग्रह समेत गरे ।
कार्यक्रममा सहभागी विद्यार्थीहरूलाई प्रमाणपत्र र मिक्लाजुङ साहित्य दर्पण पुस्तक समेतउपलब्ध गराइएको थियो ।
भाद्र १२ र १३ गते सञ्चालित दुई दिने सिर्जना कार्यशालाको अध्यक्षता लेखनाथ पुस्तकालय एवम् वाचनालयका अध्यक्ष गोविन्द बस्नेतले गरेका थिए भने कार्यक्रम सञ्चालन पुस्तकालयका सचिव पुष्प बरालले गरेका थिए ।
कार्यक्रम लेखनाथ पुस्तकालय तथा वाचनालय र मिक्लाजुङ साहित्य समाजको संयुक्त आयोजनामा पुस्तकालयको सभाहलमा सम्पन्न भएको थियो ।
Discussion about this post