विराटनगर : मोरङ प्रहरीले विराटनगर महानगरपालिका–९ स्थित ट्राफिक चौकबाट ११९ ग्राम ब्राउनसुगरसहित दुई जनालाई पक्राउ गरेको छ।
जिल्ला प्रहरी कार्यालय मोरङ र लागूऔषध नियन्त्रण ब्यूरो विराटनगरको संयुक्त टोलीले विशेष सूचनाका आधारमा भारततर्फबाट आएको भारतीय नम्बर प्लेट बी आर ३८ एसी ६५९८ नम्बरको मोटरसाइकलमा सवार दुई युवालाई नियन्त्रणमा लिएको हो।
पक्राउ पर्नेमा भारतको अररिया जोगबनी–१० का १९ वर्षीय इरफान खान र विराटनगर महानगरपालिका–१७ का १९ वर्षीय इफ्रिदि मियाँ रहेका छन्।
प्रहरीका अनुसार ट्राफिक चौक क्षेत्रमा शंकास्पद गतिविधि गरिरहेको अवस्थामा उनीहरूलाई रोकी जाँच गर्दा साथबाट ११९ ग्राम ब्राउनसुगर बरामद भएको थियो।
बरामद लागूऔषधसहित दुवैलाई नियन्त्रणमा लिएर थप अनुसन्धान अघि बढाइएको जिल्ला प्रहरी कार्यालय मोरङले जनाएको छ।
प्रहरीले पछिल्लो समय सीमावर्ती क्षेत्र हुँदै लागूऔषध ओसारपसारका घटना बढ्दै गएपछि निगरानी र चेकजाँचलाई थप कडा बनाएको जनाएको छ।
Discussion about this post