इटहरी : निजी तथा आवासीय विद्यालय अर्गनाईजेशन नेपाल (प्याब्सन) र कोशी प्रदेश प्रहरी कार्यालय विराटनगरबीच समझदारी पत्रमा हस्ताक्षर भएको छ ।
कोशी प्रदेश प्रहरी प्रमुख प्रहरी नायव महानिरीक्षक (डीआईजी) राजन अधिकारी र प्याब्सन कोशी प्रदेशका अध्यक्ष सुमित थापाबीच समझदारी पक्षमा हस्ताक्षर भएको हो ।
बुधवार (आज) कोशी प्रदेश प्रहरी कार्यालयको सभाहलमा समझदारी भएको हो ।
प्रहरी सेवालाई सम्मान गर्न बहालवाला नेपाल प्रहरी कर्मचारीहरूका सन्ततिहरूलाई निःशुल्क शिक्षा प्रदान गरी शैक्षिक विकासमा सहकार्य गर्ने, गराउने उद्देश्ले सम्झौता भएको थापाले बताए ।
कार्यक्रममा प्रहरी कर्मचारीहरूलाई थप सेवा प्रदान गर्ने उद्देश्यले व्यवस्थित तवरले चलिरहेका विद्यालयहरूसँग समन्वय र सहकार्य गरी समसामयिक विषयमा अन्तरक्रिया तथा छलफलसमेत गरिएको थियो ।
कार्यक्रममा बोल्दै प्रदेश प्रहरी प्रमुख अधिकारीले प्रहरी कर्मचारीहरूको मनोबल उच्च बनाई प्रहरी पेशालाई सम्मानका साथ अगाडि बढाउदै लैजान समाजका विभिन्न संघ संस्थाहरूसँग समन्वय र सहकार्य गरिदैँ आएको बताए ।
कार्यक्रममा कोशी प्रदेश प्रहरी कार्यालय विराटनगरका प्रहरी वरिष्ठ उपरीक्षक भीमबहादुर दाहाल, प्रहरी वरिष्ठ उपरीक्षक गोविन्द अधिकारी, प्याब्सन केन्द्रीय उपाध्यक्ष टीकाराम ढकाललगायत प्याब्सन कोशी प्रदेशका पदाधिकारीहरूको उपस्थिति रहेको थियो ।
Discussion about this post