विराटनगर : आगामी आर्थिक वर्ष २०८२।८३ का लागि कोशी प्रदेश सरकारले ल्याएको विनियोजन विधेयकमाथिको छलफल सकिएको छ। असार ७ गते प्रदेशसभामा पेस गरिएको विधेयकमाथि कुल ३८ जना सांसदहरूले धारणा राखेका थिए।
प्रदेशसभा सदस्यहरूको प्रश्नको जवाफ दिँदै आर्थिक मामिला तथा योजनामन्त्री रामबहादुर मगरले चालु खर्च पुँजीगत खर्चभन्दा धेरै देखिनुको कारण संघीय अनुदानको रकम अधिकांश चालु खर्चमै जानुपर्ने बाध्यता भएको बताए। लोकसेवा आयोगमार्फत कर्मचारी पदपूर्ति र महँगी भत्ता वृद्धि पनि चालु खर्च वृद्धि हुनुमा कारण भएको मन्त्री मगरले स्पष्ट पारे।
उनका अनुसार योजना बैंकमा ५० हजारभन्दा बढी योजना सूचीकृत हुनु सरकारको पहिलो अभ्यास हो। सांसदहरूले छनोट गरेका तथा सरकारले आवश्यक ठानेका योजनामा मात्र बजेट विनियोजन गरिएको उनले जानकारी दिए।
उद्योग, कृषि तथा सहकारी मन्त्री खगेनसिं हाङ्गामले रासायनिक मल व्यवस्थापनमा प्रदेश सरकार समन्वयकर्ताको भूमिका मात्र रहेको उल्लेख गर्दै विकासे बजेटले रोजगारी सिर्जना गर्न नसकेको कारण उत्पादन क्षेत्रमा बजेट केन्द्रित गरिएको बताए।
खानेपानी, सिँचाइ तथा ऊर्जामन्त्री एकराज कार्कीले मन्त्रालयअन्तर्गत हाल २ हजार ८२८ योजना कार्यान्वयनमा रहेको बताए। उनका अनुसार १४ स्थानीय तहमा बायोग्यास प्लान्ट स्थापना तथा ३७ बहुवर्षीय योजना सञ्चालनमा छन्। “१२ हजार ८०० हेक्टर जग्गामा सिँचाइको व्यवस्था गरिएको छ,” मन्त्री कार्कीले भने।
आन्तरिक मामिला तथा कानुनमन्त्री रेवतीरमण भण्डारीले मन्त्रालयलाई ९६ करोड रुपैयाँ बजेट विनियोजन भएको जानकारी दिँदै सुशासन, शान्ति र सेवा प्रवाहमा बजेटको प्रभावकारी उपयोग गरिने बताए। अधुरा प्रहरी चौकीहरू पूर्णता दिने, लागुऔषध नियन्त्रण र सवारी दुर्घटना न्यूनीकरणमा सरकार गम्भीर भएको उनले बताए।
पर्यटन, वन तथा वातावरणमन्त्री सदानन्द मण्डलले पदमार्ग निर्माणलगायतका योजनामा बजेट छुट्याइएको र कुनै अराजक काम नगरिएको स्पष्ट गरे।
भौतिक पूर्वाधार तथा स्वास्थ्य मन्त्री भूपेन्द्र राईले जिल्ला अस्पतालहरूको अवस्थापन सुधार, उपकरण तथा जनशक्ति व्यवस्थापनमा बजेट विनियोजन गरिएको जानकारी दिए।
सामाजिक विकासमन्त्री पाँचकर्ण राईले मुसहर समुदायका लागि सक्षम छोरी योजना र पहाडका लागि आवासीय विद्यालय निर्माणमा बजेट छुट्याइएको बताए। मन्त्रालयको ४४ कार्यक्षेत्रभित्रका जनअपेक्षालाई सम्बोधन गर्न सकिने विश्वास पनि व्यक्त गरे।
प्रदेशसभाको अर्को बैठक असार १२ गते बिहान ११ बजेका लागि तोकिएको छ।
Discussion about this post