इटहरी : इटहरी उपमहानगरपालिका–१ स्थित कामधेनु दूग्ध विकास सहकारी संस्थाले सेयर सदस्यता खारेजीसम्बन्धी उजुरीको विषयमा कोशी प्रदेश सहकारी रजिस्ट्रार कार्यालयलाई लिखित जवाफ पेस गरेको छ ।
रजिस्ट्रार कार्यालयका निमित्त कार्यालय प्रमुख महानन्द रिजालका अनुसार कामधेनु सहकारीले पुस ७ गते विनियमसहितका कागजात र आवश्यक सामग्री संलग्न गरी जवाफ पठाएको हो ।
उनका अनुसार अब रजिस्ट्रार विभागभित्र छलफल प्रक्रिया सुरु हुनेछ ।
‘रजिस्ट्रार आएपछि छलफल गरेर कारबाहीका मापदण्डबारे अध्ययन हुन्छ,’ रिजालले भने, ‘रजिस्ट्रार कार्यालयको ऐन र कामधेनु सहकारीको विनियम एक–आपसमा मिल्छ कि मिल्दैन भन्ने हेरेर निर्णय लिइन्छ ।’
विशेषगरी संघीय सहकारी कानुनी व्यवस्थाअनुसार कामधेनुले सेयर सदस्य हटाउँदा अपनाएको प्रक्रिया वैधानिक छ कि छैन भन्ने विषयमा गहिरो अध्ययन गरिने र सोही आधारमा निष्कर्ष निकालिने उनले बताए ।
‘यदि प्रक्रिया पूरा नगरी कारबाही गरिएको देखियो भने थप कानुनी प्रक्रिया अगाडि बढाइन्छ,’ रिजालले भने ।
यसअघि पूर्व अध्यक्ष कृष्णप्रसाद अधिकारी र सेयर सदस्य मनोज दाहाललाई सेयर सदस्यताबाट हटाइएको निर्णयविरुद्ध उजुरी परेपछि रजिस्ट्रार कार्यालयले सात दिनभित्र स्पष्ट जवाफ पेस गर्न निर्देशन दिएको थियो ।
खासगरी सहकारी ऐन, विनियम र संघीय कानुनी मापदण्डअनुसार प्रक्रिया नपुगेको ठहर भएमा संस्थामाथि थप कारबाही हुनसक्ने बुझिएको छ ।
कामधेनु सहकारीको मंसिर १२ गते बसेको सञ्चालक समितिको बैठकले ‘भ्रामक तथा तथ्यहीन समाचार सम्प्रेषण गरेको’ आरोपमा अधिकारी र दाहाललाई सेयर सदस्यताबाट हटाउने निर्णय गरेको थियो ।
उनीहरूले संस्थाका अध्यक्ष यादप ढकालले ‘मनोपोली’ निर्णय गरेको बताउँदै उक्त निर्णयविरुद्ध मंसिर २४ गते प्रदेश सहकारी रजिस्ट्रार कार्यालयमा निवेदन दर्ता गराएका थिए ।
यो पनि – कामधेनु सहकारीको विवाद उत्कर्षमा, सेयर सदस्य निष्कासनपछि रजिष्ट्रार कार्यालयले माग्यो जवाफ
यो पनि – कर्मचारी आत्महत्या प्रकरणमा घेरिएपछि कामधेनु सहकारीद्वारा पत्रकारलाई खाममा पैसा !
Discussion about this post