इटहरी : इटहरी उपमहानगरपालिका–१ स्थित कामधेनु दुग्ध विकास सहकारी संस्थामा देखिएको विवाद उत्कर्षमा पुगेको छ ।
सेयर सदस्यता खारेजीसम्बन्धी उजुरी परेपछि कोशी प्रदेश सहकारी रजिस्ट्रार कार्यालयले सहकारीलाई सात दिनभित्र लिखित जवाफ पेस गर्न निर्देशन दिएको हो।
पूर्व अध्यक्ष कृष्णप्रसाद अधिकारी र सेयर सदस्य मनोज दाहाललाई सेयर सदस्यताबाट हटाइएको निर्णयविरुद्ध रजिस्ट्रार कार्यालयमा उजुरी परेको थियो। उजुरीमा सदस्यता खारेजी बिना कारण, बदनियतपूर्ण र सहकारी ऐनविपरीत गरिएको दाबी गरिएको छ।
रजिस्ट्रार कार्यालयले पठाएको पत्रमा सेयर सदस्य हटाउँदा अपनाइएको प्रक्रिया, सञ्चालक समितिको निर्णय, कानुनी आधार र सोको औचित्य खुल्ने प्रमाणसहित जानकारी उपलब्ध गराउन निर्देशन दिएको छ।
कामधेनु सहकारीको मंसिर १२ गते बसेको सञ्चालक समितिको बैठकले ‘भ्रामक तथा तथ्यहीन समाचार सम्प्रेषण गरेको’ आरोपमा अधिकारी र दाहाललाई सेयर सदस्यताबाट हटाउने निर्णय गरेको थियो।
उनीहरूले उक्त निर्णयविरुद्ध मंसिर २४ गते प्रदेश सहकारी रजिस्ट्रार कार्यालयमा निवेदन दर्ता गराएका थिए।
‘संस्थाले बिनाकारण सेयर सदस्य खारेज गरेको, भ्रामक र तथ्यहीन समाचार सम्प्रेषण गरेको भनी सेयर सदस्यता बदनियतपूर्वक खारेज गरेको कारण न्याय दिलाइदिनुहुन भनी निवेदन पेस भएको हुँदा सो सम्बन्धमा के–कसो भएको हो ? पछिसम्म फरक नपर्ने गरी संस्थाले निजहरूलाई सेयर सदस्यताबाट हटाउँदा अवलम्बन गरेका प्रक्रिया, संस्थागत निर्णयहरूको छाँयाकपीसमेत संलग्न राखी पत्र प्राप्त भएको मितिले ७ (सात) दिनभित्र यस कार्यालयमा जानकारी उपलब्ध गराउनुहुन अनुरोध छ,’ रजिस्ट्रार कार्यालयले पठाएको पत्रमा भनिएको छ ।
यसैबीच, कर्मचारी मिश्रले बजार प्रमुख रञ्जित झा र बजार प्रतिनिधि शेरबहादुर खडकाको नाममा ‘सुसाइड नोट’ लेखेर आत्महत्या गरेका थिए । घटनापछि सहकारीको व्यवस्थापन शैली र कार्यस्थल वातावरणबारे प्रश्न उठेका छन्।
घटनालाई सामसुम पार्न अध्यक्ष ढकालले प्रयास गरेका थिए । ढकालले मिश्रको काममा असन्तुष्टि जनाउँदै स्पष्टीकरण सोधेका थिए ।
संस्थाबाट पटकपटक दबाब दिइएको र मानसिक यातना दिइएकाले मिश्रले आत्महत्या गरेको पीडित परिवारले जनाउँदै आएका छन् ।
मिश्रको निधनपछि अध्यक्ष ढकालसहित अन्य कर्मचारीहरू समवेदना दिन झापास्थित घर गएका थिए । त्यस क्रममा स्थानीयले उनीहरूलाई दुव्र्यवहार गरी अपमानजनक व्यवहार गरे ।
फर्किने क्रममा मोरङस्थित पथरीको जङ्गलमा आइपुगेपछि सँगै गएका सबैको मोबाइल फोन ढकालले नै नियन्त्रणमा लिएर सोधपुछ गरी मानसिक यातनासमेत दिएको घटना बाहिरिएको थियो ।
कारबाहीमा परेका अधिकारी, दाहाल र कर्मचारी तेजप्रसाद सुवेदीले पत्रकार सम्मेलन गरी संस्थामा आर्थिक तथा प्रशासनिक अनियमितता भएको आरोप लगाएका छन्। सेयर सदस्यद्धयलाई निष्कासन गर्दा कर्मचारी सुवेदीलाई भने तीन महिनाका लागि निलम्बन गरिएको छ ।
उनीहरूले पत्रकार सम्मेलन गरी अध्यक्ष ढकालले संस्थाबाट कानुन विपरीत तलव बुझेको, मोरङमा बनिगामा सहकारी संस्था सञ्चालन गरी आफ्नै पत्नीलाई व्यवस्थापक बनाएको र त्यसै समयमा युवा स्वरोजगार कार्यालयबाट ४० लाख रुपैयाँ ऋण लिएको भएपनि नक्कली ऋणी खडा गरेर उक्त रकम हिनामिना गरेको, बनिगामाका तीन जना कर्मचारीहरुलाई कामधेनुबाट तलव भत्ता खुवाइएको आरोप लगाएका थिए ।
अध्यक्ष ढकालले व्यक्तिगत रिसइबी राखेर संस्था सञ्चालन गरेको, गैरकानुनी र गैरजिम्मेवार तरिकाले पूर्वाग्रह राखेर आफूलाई साधारण सदस्यबाटै हटाइएकोमा उनीहरूले आपत्ति जनाएका थिए ।
यता, संस्थाले भने आरोप–प्रत्यारोपमै उत्रिएको छ । संस्थाबाट कारबाहीमा परेकाहरूको पत्रकार सम्मेलनलगत्तै संस्थाले पनि पत्रकार सम्मेलन गरी प्रत्यारोपमा उत्रिएको छ ।
सहकारीले ती आरोप अस्वीकार गर्दै कानुनअनुसार कारबाही गरिएको दाबी गरेको छ।
अध्यक्ष यादप ढकालले जारी गरेको विज्ञप्तिमा संस्थाको हितविपरीत कार्य गर्ने सेयर सदस्य र कर्मचारीलाई नियमअनुसार कारबाही गरिएको उल्लेख गरिएको छ।
‘कामधेनु दुग्ध विकास सहकारी संस्थाको सन्दर्भमा कर्मचारी तथा सेयर सदस्यले लगाएको सम्पूर्ण आरोप–प्रत्यारोप मिथ्या रहेको छ । संस्थाले उक्त घटना तथा अन्य समसामामिक विषयहरूमा गोष्ठी तथा सभा सम्मेलन गर्दा सम्पूर्ण सदस्यलाई लिखित, मौखिक वा प्रविधिको प्रयोग गरि जानकारी पठाउने गरिएको छ,’ उनले विज्ञप्तिमा भनेका छन्, ‘संस्थाले कुनैपनि कार्य सहकारी ऐन, नियमावली, संस्थाको स्वीकृत विनियम नीति निर्देशिका सञ्चालक समितिको निर्णय तथा नेपाल सरकारको प्रचलित कानुन बमोजिम गरेको छ ।’
यो पनि – कर्मचारी आत्महत्या प्रकरणमा घेरिएपछि कामधेनु सहकारीद्वारा पत्रकारलाई खाममा पैसा !
Discussion about this post