मोरङ : उपभोक्तालाई वितरण गर्ने एलपी ग्यासको सिलिन्डरमा तोकिएको परिमाणभन्दा कम ग्यास भेटिएपछि मोरङको कोशी ग्यास उद्योग कारबाहीमा परेको छ।
जिल्ला प्रशासन कार्यालय मोरङले बजार अनुगमनका क्रममा बूढीगंगा गाउँपालिका–४ स्थित कोशी ग्यास उद्योग प्रालिका सिलिन्डरमा तौलसम्बन्धी कैफियत भेटिएपछि दुई लाख ९० हजार जरिवाना गरेको हो।
प्रशासनका अनुसार उद्योग परिसरमा रहेका १४३ वटा भरिएका सिलिन्डरमध्ये ६४ वटाको तौल परीक्षण गरिएको थियो।
परीक्षण गर्दा एउटा सिलिन्डरमा १३.७४५ किलोग्राम मात्र ग्यास भेटिएको थियो। बाँकी ६३ वटा सिलिन्डरको समेत औसत तौल मापदण्डभन्दा कम पाइएको प्रशासनले जनाएको छ।
अनुगमनका क्रममा खाली सिलिन्डरको तौलसमेत परीक्षण गर्दा तोकिएकोभन्दा १०० देखि १५० ग्रामसम्म बढी पाइएको थियो। खाली सिलिन्डरको तौल बढी हुँदा उपभोक्ताले तिर्ने रकमअनुसार वास्तविक ग्यासको परिमाण अझ कम हुन सक्ने प्रशासनको निष्कर्ष छ।
ग्यास उद्योग अत्यावश्यक सेवाअन्तर्गत पर्ने भए पनि अनुगमन टोली पुग्दा उद्योग बन्द अवस्थामा रहेको पाइएको थियो। त्यसका कारण उद्योगमाथि जरिवानासँगै थप कानुनी प्रक्रिया अघि बढाइएको जिल्ला प्रशासन कार्यालयले जनाएको छ।
यसैबीच विराटनगर महानगरपालिका–७ स्थित श्रीकृष्ण ट्रेडर्सलाई पनि अनुगमनमा अवरोध गरेको भन्दै ११ हजार जरिवाना गरिएको छ। अनुगमन टोलीलाई जाँचबुझ तथा निरीक्षणमा सहयोग नगरेपछि ट्रेडर्समाथि कारबाही गरिएको प्रशासनले जनाएको छ।
एलपी ग्यासको वितरण प्रणाली व्यवस्थित बनाउने तथा उपभोक्तामाथि हुने ठगी नियन्त्रण गर्ने उद्देश्यले बजार अनुगमनलाई तीव्रता दिइएको प्रशासनले जनाएको छ। अनुगमनका क्रममा कैफियत भेटिए थप कडा कारबाही गर्ने चेतावनीसमेत प्रशासनले दिएको छ।
Discussion about this post